കണ്ണൂര്‍: ഗ്രാമീണ തപാല്‍ ജീവനക്കാരുടെ പണിമുടക്ക് 15 ദിവസം പിന്നിട്ടു. സമരം ഒത്തുതീര്‍ക്കുന്നതിനുള്ള ചര്‍ച്ച ഉന്നതതലങ്ങളില്‍ നടക്കാത്തത് സമരക്കാരെയും ജനങ്ങളെയും ഒരുപോലെ ആശങ്കയിലാക്കിയിട്ടുണ്ട്. കേന്ദ്രസര്‍ക്കാര്‍ നിലപാടില്‍ പ്രതിഷേധിച്ച് അഖിലേന്ത്യാ തപാല്‍ സര്‍വിസ് സംഘടനകളുടെ ആഹ്വാന പ്രകാരം ദേശവ്യാപകമായി ഇന്നുമുതല്‍ പോസ്റ്റല്‍ ഡിവിഷനില്‍ ഓഫിസുകള്‍ക്ക് മുന്നില്‍ അനിശ്ചിതകാല റിലേ നിരാഹാര സത്യഗ്രഹ സമരം ആരംഭിക്കും.
പണിമുടക്കിയ ജീവനക്കാര്‍ ഹെഡ് പോസ്‌റ്റോഫിസ് പരിസരത്ത് പ്രതിഷേധ പ്രകടനവും പൊതുയോഗവും നടത്തി. ആള്‍ ഇന്ത്യ പോസ്റ്റല്‍ എംപ്ലോയിസ് യൂനിയന്‍ മുന്‍ സംസ്ഥാന പ്രസിഡന്റ് കെ. നാരായണന്‍ ഉദ്ഘാടനം ചെയ്തു. ദിനു മൊട്ടമ്മല്‍ അധ്യക്ഷനായി. എം.പി ജനാര്‍ദ്ദന്‍, എ. ഗണേശന്‍, കെ. സുനില്‍ കുമാര്‍ എ.പി സുജികുമാര്‍, പി. പ്രേമദാസന്‍, എ.വി ഗണേശന്‍ സംസാരിച്ചു.