കിളിമാനൂര്‍: റിയാദില്‍വച്ച് ഹൃദയാഘാതത്തെ തുടര്‍ന്ന് മരിച്ച ചെറുപ്പക്കാരന്റെ കുടുംബത്തെ സഹായിക്കാന്‍ സാംസ്‌കാരിക സംഘടനയായ കേളി കലാ സാംസ്‌കാരിക വേദി രംഗത്ത്.
കൊടുവഴന്നൂര്‍ ഷാനവാസ് വില്ലയില്‍ ഷാനവാസാണ് റിയാദില്‍ ജോലിക്കിടെ ഹൃദയാഘാതത്തെ തുടര്‍ന്ന് മരണത്തിനു കീഴടങ്ങിയത്. റിയാദിലെ സാംസ്‌കാരിക സംഘടനയായ കേളിയുടെ സജീവപ്രവര്‍ത്തകനായിരുന്നു ഇയാള്‍. പറക്കമുറ്റാത്ത രണ്ടു പെണ്‍കുട്ടികളുള്ള ഷാനവാസ് ജീവിതം തള്ളിനീക്കാനാണ് റിയാദിലെത്തിയത്. ഭാര്യാപിതാവിന്റെ ചികിത്സക്കായി പത്തു ലക്ഷത്തോളം രൂപ ബാങ്കില്‍നിന്നും വായ്പയെടുത്ത ബാധ്യതയും ഷാനവാസിനുണ്ടായിരുന്നു. എന്നാല്‍ അപ്രതീക്ഷിതമായി വിധി ഹൃദയാഘാതത്തിന്റെ രൂപത്തില്‍ ഷാനവാസിന്റെ ജീവനെടുക്കുകയായിരുന്നു. ഇതിനിടെയാണ് ഭാര്യ ജസീനക്ക് സാന്ത്വനവുമായി കേളി കലാ സാംസ്‌കാരികവേദി രംഗത്തെത്തിയത്. 570550 രൂപയാണ് ധനസഹായമായി കേളി കലാ സാംസ്‌കാരിക വേദി കൈമാറിയത്. കിളിമാനൂരില്‍ നടന്ന ചടങ്ങില്‍ സി.പി.എം ജില്ലാ സെക്രട്ടറി ആനാവൂര്‍ നാഗപ്പന്‍ ഷാനവാസിന്റെ വിധവ ജസീനക്ക് ധനസഹായത്തിന്റെ ചെക്ക് കൈമാറി.