പന്തിപ്പൊയില്‍: തെരുവുനായയുടെ ആക്രമണത്തില്‍ സ്ത്രീയുള്‍പ്പടെ മൂന്നുപേര്‍ക്ക് പരുക്ക്. പന്തിപ്പൊയില്‍ ടൗണില്‍ വൈകിട്ടാണ് സംഭവം. വൈകിട്ട് ഏഴോടെ ടൗണില്‍ നില്‍ക്കുകയായിരുന്ന കുഞ്ഞൂസന്‍ അലി മുസ്‌ലിയാര്‍ (35), കുഞ്ഞൂസന്‍ ഫാത്തിമ (60), അറക്ക മൊയ്തീന്‍ (65) എന്നിവര്‍ക്കാണ് തെരുവു നായയുടെ കടിയേറ്റത്. കൈകള്‍ക്കും കാലുകള്‍ക്കും സാരമായി കടിയേറ്റിട്ടുണ്ട്. ഇവരെ മാനന്തവാടി ജില്ലാ ആശുപത്രിയില്‍ പ്രവേശിച്ചു. രൂക്ഷമായ തെരുവു നായ ശല്യം കാരണം രാവിലെയും വൈകിട്ടും മദ്‌റസയില്‍ പോകുന്ന കുട്ടികളടക്കം ഭയവിഹ്വലരാണെന്നും തെരുവു നായ ശല്യം രൂക്ഷമാണന്നും ഇതിന് അടിയന്തിര നടപടി സ്വീകരിക്കണമെന്നും നാട്ടുകാര്‍ അവശ്യപ്പെട്ടു. അധികൃതരുടെ അനാസ്ഥയാണ് ഇതിന് കാരണമെന്നും നാട്ടുകാര്‍ പറഞ്ഞു.