പറവൂര്‍: കണ്ണന്‍ചിറ തൈവെപ്പ് റോഡിലെ കാനകള്‍ക്കു കവര്‍ സ്‌ളാബിട്ടു മൂടണമെന്നാവശ്യം ഏറുന്നു.
വീതികുറഞ്ഞ റോഡില്‍ ഇരുവശങ്ങളിലും പണിതിട്ടുള്ള കാനകള്‍ക്ക് കവര്‍ സ്‌ളാബ് വക്കാത്തത് കൂടുതല്‍ അപകടങ്ങള്‍ ക്ഷണിച്ചുവരുത്തുമെന്ന് നാട്ടുകാര്‍. റോഡ് ബി.എം.ബി.സി ടാറിംഗ് നടത്തിയതോടെ റോഡ് അരയടിയോളം പൊങ്ങിയതും കാനകള്‍ക്ക് ആഴവും വര്‍ദ്ധിച്ചിരിക്കയാണ്.
റോഡ് പണി നടത്തിയിട്ടും റോഡിന്റെ വശങ്ങള്‍ നികത്താതെ ഇട്ടിരിക്കുന്നത് അപകട സാദ്ധ്യത വര്‍ദ്ധിപ്പിക്കുകയാണ്. കണ്ണന്‍ചിറമുതല്‍ കെടാമംഗലം ചന്ദ്രപുര പാലംവരെ മെയിന്‍ റോഡ് വക്കില്‍ കാനകള്‍ നിര്‍മ്മിച്ചിട്ട് നാളുകള്‍ ഏറെയായെങ്കിലും ചില സ്ഥലങ്ങളില്‍ മാത്രമാണ് കാനക്ക് കവര്‍ സ്‌ളാബ് വച്ചിട്ടുള്ളത്.
ഈ പ്രദേശങ്ങളില്‍ റോഡിനു വീതി കുറവായതിനാല്‍ അപകടങ്ങള്‍ നിത്യസംഭവമാണ്. ഇരുചക്ര വാഹനക്കാരും കാല്‍നടക്കാരുമാണ് ഏറെയും അപകടത്തില്‍ പെടുന്നത്.കാലവര്‍ഷമായാല്‍ കാനയിലും റോഡിലും വെള്ളം നിറഞ്ഞാല്‍ കാനയും റോഡും തമ്മില്‍ തിരിച്ചറിയാന്‍ കഴിയാത്ത അവസ്ഥയാണ് ഈ ഭാഗങ്ങളിലുള്ളത്. കഴിഞ്ഞ വര്‍ഷത്തില്‍ രാത്രിയില്‍ മഴവെള്ളം നിറഞ്ഞ കാനയില്‍ വീണ് ടൂവീലര്‍ യാത്രക്കാരന്‍ മരിച്ചിരുന്നു.
മഴ സീസണുകളില്‍ വലിയ വാഹനങ്ങള്‍ വരെ കാനകള്‍ തിരിച്ചറിയാന്‍ കഴിയാതെ അപകടത്തില്‍ പ്പെട്ട സന്ദര്‍ഭങ്ങള്‍ ഉണ്ടായിട്ടുണ്ട്. കണ്ണന്‍ചിറ പെരുമ്പടന്ന റോഡില്‍ ആരംഭിച്ചിട്ടുള്ള ബി എം ബി സി ടാറിംഗ് പൂര്‍ത്തയാകുമ്പോള്‍ റോഡ് പൊങ്ങുന്നതോടെ കാനകളുടെ കവര്‍സ്‌ളാബ് ഇട്ടില്ലെങ്കില്‍ ഗുരുതരമായ അപകട സ്ഥിതിയാണ് ഉണ്ടാവുക.
ആയതിനാല്‍ റോഡ് പണി പൂര്‍ത്തീകരിക്കുന്ന മുറക്ക് കാനകള്‍ക്കു മീതെ കോണ്‍ക്രീറ്റ് കവറിട്ട് നടപ്പാത നിര്‍മ്മിക്കണമെന്നാണ് നാട്ടുകാരുടെ ആവശ്യം. ഇതുമായി ബന്ധപ്പെട്ടു നഗരസഭാ കൗണ്‍സിലര്‍മാര്‍ നേരത്തെ പ്രമേയം അവതരിപ്പിച്ചിരിന്നു.
നഗരസഭയുടെ കെടാമംഗലം പ്രദേശത്തെ ഇരുപത്തിനാല്,ഇരുപത്തേഴ് വാര്‍ഡുകളിലെ കൗണ്‍സിലര്‍മാരായ സി പി ജയനും ജ്യോതിദിനേശനുമാണ് കൗണ്‍സില്‍ യോഗത്തില്‍ പ്രമേയം അവതരിപ്പിച്ചു പാസാക്കിയത്.