മുംബൈ :  കൊവിഡ് വ്യാപന പശ്ചാത്തലത്തില്‍ എത്രയും പെട്ടെന്ന് രാജ്യത്തെ സേവിക്കാനായി ഐ.എ.എസ് സര്‍വിസില്‍ തിരികെ പ്രവേശിക്കണമെന്ന കേന്ദ്ര ക്ഷണം നിരസിച്ച് മുന്‍ ഐ.എ.എസ് ഓഫിസര്‍ കണ്ണന്‍ ഗോപിനാഥന്‍. ജമ്മുകശ്മിരിലെ ജനങ്ങള്‍ക്ക് സ്വാതന്ത്ര്യം നിഷേധിക്കുന്നതില്‍ പ്രതിഷേധിച്ചാണ് എട്ടു മാസം മുന്‍പ് അദ്ദേഹം ഐ.എ.എസ് വിട്ടത്.  രാജി ഇതുവരെ സ്വീകരിച്ചിട്ടില്ലാത്തതിനാല്‍ ഉടന്‍ സര്‍വിസില്‍ തിരികെ പ്രവേശിക്കണമെന്നാണ് കേന്ദ്ര സര്‍ക്കാര്‍ ആവശ്യപ്പെട്ടത്. അതേസമയം പദവിയിലേക്ക് വീണ്ടും മടങ്ങുന്നില്ലെന്നു പറഞ്ഞ അദ്ദേഹം ഒരു വളണ്ടിയറെന്ന നിലയില്‍ ജനങ്ങളെ സേവിക്കാന്‍ തയാറാണെന്നും ട്വിറ്ററിലൂടെ അറിയിച്ചു. കഴിഞ്ഞമാസം ആഗസ്റ്റില്‍ ജമ്മുകശ്മിരിനുള്ള പ്രത്യേക അവകാശങ്ങളും ഭരണഘടനയുടെ 370ാം വകുപ്പും പിന്‍വലിച്ച സര്‍ക്കാര്‍ നിലപാടില്‍ പ്രതിഷേധാച്ചാണ് ദമന്‍ ദിയുവില്‍ സേവനം ചെയ്യുകയായിരുന്ന കണ്ണന്‍ ഗോപിനാഥന്‍ ഐ.എ.എസ്  സര്‍വിസില്‍ നിന്ന് രാജിവച്ചത്. രാജിവച്ചശേഷം നിരവധി സര്‍ക്കാര്‍ വിരുദ്ധ പ്രക്ഷോഭങ്ങളില്‍ പങ്കെടുത്ത കണ്ണന്‍ ഗോപിനാഥനെ യു.പിയിലെ അലിഗഡ് മുസ്‌ലിം യൂനിവേഴ്‌സിറ്റിയിലേക്കു പോകുന്നതിനിടെ അറസ്റ്റ് ചെയ്തിരുന്നു.