പെരിന്തല്‍മണ്ണ: വികസന പദ്ധതികളും ബജറ്റുകളും പ്രഖ്യാപിക്കുമ്പോള്‍ ബി.ജെ.പിയുടെ ഇന്ത്യയില്‍ കേരളമില്ലെന്ന അവസ്ഥയാണുള്ളതെന്ന് മലപ്പുറം പാര്‍ലമെന്റ് മണ്ഡലം ഉപതെരെഞ്ഞെടുപ്പ് യു.ഡി.എഫ് സ്ഥാനാര്‍ഥി പി.കെ കുഞ്ഞാലിക്കുട്ടി. പെരിന്തല്‍മണ്ണ മണ്ഡലത്തില്‍ നടത്തിയ സ്ഥാനാര്‍ഥി പര്യടനത്തിന് ആനമങ്ങാട് നല്‍കിയ സ്വീകരണത്തില്‍ സംസാരിക്കുകയായിരുന്നു അദ്ദേഹം. കടുത്ത വിവേചനമാണ് കേരളത്തോട് കേന്ദ്രം കാണിക്കുന്നത്. യു.പി.എ സര്‍ക്കാര്‍ മലപ്പുറത്തിന് അനുവദിച്ച അലീഗഡ് കാംപസിന്റെ പുരോഗതിക്കായി കടുത്ത സമ്മര്‍ദ്ദം ആവശ്യമായിരിക്കുകയാണ്.

പാര്‍ലമെന്റിലെത്തിയാല്‍ അലീഗഡിനായി ശബ്ദമുയര്‍ത്തും. വിദ്യഭ്യാസം, റയില്‍വെ, ജനക്ഷേമം തുടങ്ങിയ ഏതു വികസന പദ്ധതി നടപ്പിലാക്കിയാലും കേരളത്തെ മാറ്റി നിര്‍ത്തുന്ന അവസ്ഥയാണുള്ളത്. ഇത്തരം ചിറ്റമ്മ നയത്തിനെതിരേയുള്ള ആദ്യ പ്രതികരണമായി മലപ്പുറം ഉപതെരഞ്ഞെടുപ്പിനെ കാണണം.

കേന്ദ്രത്തില്‍ ബി.ജെ.പിക്ക് ബദലായി മതേതര ജനാധിപത്യ ചേരിയെ കെട്ടപ്പടുക്കാന്‍ കോണ്‍ഗ്രസിന് മാത്രമെ കഴിയൂ. തെരെഞ്ഞെടുക്കപ്പെടുന്ന പക്ഷം കോണ്‍ഗ്രസിന് കീഴിലുള്ള മതേതര ജനാധിപത്യ സഖ്യത്തിന് ശ്രമിക്കുമെന്നും അദ്ദേഹം പറഞ്ഞു.