മഞ്ചേരി: നഗരസഭയിലെ വേട്ടേക്കോട് സ്ഥാപിക്കാനായി കൊണ്ടുവന്ന പ്ലാസ്റ്റിക്ക് ഷ്രെഡിങ് യൂനിറ്റ്് നാട്ടുകാര്‍ തടഞ്ഞു. നഗരസഭാ ട്രഞ്ചിങ് ഗ്രൗണ്ടിന് സമീപം ഇന്നലെ വൈകിട്ട് മൂന്നോടെയാണ് ലോറിയില്‍ യന്ത്രങ്ങളെത്തിച്ചത്. സ്ത്രീകളും കുട്ടികളുമുള്‍പ്പെടെ നൂറോളം പ്രദേശവാസികളാണ് യന്ത്രം ഇറക്കുന്നത് തടഞ്ഞത്. നഗരസഭ ചെയര്‍പേഴ്‌സണ്‍ വി.എം സുബൈദ, വൈസ് ചെയര്‍പേഴ്‌സണ്‍ വി.പി ഫിറോസ്, വല്ലാഞ്ചിറ മുഹമ്മദാലി തുടങ്ങിയവര്‍ സ്ഥലത്തെത്തി ചര്‍ച്ച നടത്തിയെങ്കിലും തര്‍ക്കം രൂക്ഷമാവുകയായിരുന്നു.
ഇതേതുടര്‍ന്ന് മഞ്ചേരി പൊലിസ് സ്ഥലത്തെത്തി. ചര്‍ച്ചകള്‍ക്കൊടുവില്‍ മെഷീനുകള്‍ തിരികെ കൊണ്ടുപോകാന്‍ തീരുമാനിക്കുകയായിരുന്നു.എല്ലാവരുടെയും സമ്മതത്തോടെ മാത്രമെ യൂനിറ്റ് ആരംഭിക്കുകയുള്ളൂവെന്നും അറിയിച്ചതോടെയാണ് നാട്ടുകാര്‍ പിരിഞ്ഞു പോയത്.
നഗരസഭയുടെ മാലിന്യ സംസ്‌കരണകേന്ദ്രം പ്രദേശവാസികളുടെ എതിര്‍പ്പിനെ തുടര്‍ന്ന് അഞ്ചുവര്‍ഷമായി പൂട്ടിക്കിടക്കുകയാണ്. ശാസ്ത്രീയമായ മാലിന്യസംസ്‌കരണം വേണമെന്ന ഹൈക്കോടതി നിര്‍ദേശം ആറുവര്‍ഷമായിട്ടും നടപ്പായില്ല. അതേസമയം മഞ്ചേരിയിലെ പ്ലാസ്റ്റിക് മാലിന്യ സംസ്‌കരണ പ്രവര്‍ത്തനങ്ങള്‍ക്ക് സഹായകരമാകുമായിരുന്ന ഈ സംവിധാനം സ്ഥാപിക്കുന്നതിനു പ്രതിപക്ഷം തടസം സൃഷ്ടിക്കുകയാണെന്നും ഇടതുപക്ഷ കൗണ്‍സിലര്‍മാര്‍ തന്നെ ഇതിനു നേതൃത്വം നല്‍കുന്നത് ജനങ്ങളോടുള്ള വെല്ലുവിളിയാണെന്നും ചെയര്‍പേഴ്‌സണ്‍ വി.എം സുബൈദ പറഞ്ഞു.
എന്നാല്‍ ഈ വിഷയത്തില്‍ നേരത്തെയുള്ള കോടതിയുടെ നിര്‍ദേശം പാലിക്കാതെയുള്ള ഭരണസമിതിയുടെ നടപടി അംഗീകരിക്കാനാകില്ലെന്നാണ് പ്രതിപക്ഷത്തിന്റെ നിലപാടെന്ന് അഡ്വ. കെ. ഫിറോസ് ബാബു പ്രതികരിച്ചു.