കോട്ടയം: രാജ്യസഭാ സീറ്റ് നല്‍കിയതുമായി ബന്ധപ്പെട്ട് ചില കോണ്‍ഗ്രസ് നേതാക്കളുടെ അഭിപ്രായ പ്രകടനങ്ങള്‍ക്ക് മറുപടി പറയാനില്ലെന്ന് കേരളാ കോണ്‍ഗ്രസ് (എം) ചെയര്‍മാന്‍ കെ.എം മാണി. അതിന്റെ പേരില്‍ കോണ്‍ഗ്രസുമായി അകല്‍ച്ചയുണ്ടാക്കാന്‍ ആരും ശ്രമിക്കേണ്ടെന്നും അദ്ദേഹം കോട്ടയത്ത് മാധ്യമപ്രവര്‍ത്തകരോട് പറഞ്ഞു.
കോണ്‍ഗ്രസിനെതിരേ നടത്തിയ പ്രസ്താവനകള്‍ക്ക് മാണി ഖേദപ്രകടനം നടത്തണമെന്ന വി.എം സുധീരന്റെ അടക്കം കോണ്‍ഗ്രസ് നേതാക്കള്‍ ഉന്നയിച്ച ആരോപണങ്ങളോട് പ്രതികരിക്കുകയായിരുന്നു മാണി.
ജോസ് കെ. മാണിക്ക് രാജ്യസഭാ സീറ്റില്‍ യാതൊരു താല്‍പര്യവുമുണ്ടായിരുന്നില്ല. എന്നാല്‍, നിര്‍ണായക ഘട്ടത്തിലാണ് കോണ്‍ഗ്രസ് കേരളാ കോണ്‍ഗ്രസിന് സീറ്റ് നല്‍കിയത്. അത് കോണ്‍ഗ്രസിന്റെ നല്ല മനസാണ് കാണിക്കുന്നത്. അതിനെ ചെറുതായി കാണരുതെന്നാണ് താന്‍ ജോസ് കെ. മാണിയോട് പറഞ്ഞത്. അതിനാലാണ് ഉന്നതനായ ഒരു നേതാവിനെ തന്നെ സ്ഥാനാര്‍ഥിയാക്കാന്‍ തീരുമാനിച്ചത്. കോണ്‍ഗ്രസ് ത്യാഗം സഹിച്ച് നല്‍കിയ സീറ്റിലേക്ക് പ്രമുഖനായ ഒരാളെ അയയ്ക്കണമെന്ന് പാര്‍ട്ടി തീരുമാനിക്കുകയായിരുന്നു. അക്കാര്യമാണ് പാര്‍ട്ടി വര്‍ക്കിങ് ചെയര്‍മാന്‍ പി.ജെ ജോസഫ് പ്രഖ്യാപിച്ചത്. അതേസമയം, ഖേദം പ്രകടിപ്പിക്കേണ്ട ഒരു പ്രസ്താവനയൊന്നും താന്‍ നടത്തിയിട്ടില്ലെന്ന് വി.എം സുധീരന് മറുപടിയായി മാണി കൂട്ടിച്ചേര്‍ത്തു.