പടിഞ്ഞാറങ്ങാടി: ഏറെ ഒച്ചപ്പാടുകള്‍ക്ക് വഴിവെച്ചേക്കാവുന്ന ഏകീകൃത സിവില്‍ കോഡ് നടപ്പാക്കാനുള്ള കേന്ദ്ര സര്‍ക്കാര്‍ നീക്കത്തിനെതിരെ പ്രതികരിച്ച മുസ്‌ലീം ലീഗിന് പരോക്ഷ വിമര്‍ശനവുമായി വി.ടി ബല്‍റാം എം.എല്‍.എ യുടെ ഫേസ്ബുക്ക് പോസ്റ്റ്. വ്യക്തി നിയമത്തില്‍ കാലോചിത പരിഷ്‌കാരം വരുത്തണമെന്നാണ് ബല്‍റാം ആവശ്യപ്പെട്ടിരിക്കുന്നത്. വ്യക്തിനിയമങ്ങള്‍ കാലാനുസൃതമായി പരിഷ്‌കരിക്കേണ്ടത് തന്നെയാണ്.
ലിംഗനീതിയും സമത്വവുമടക്കമുള്ള ഭരണഘടനാ സങ്കല്‍പ്പങ്ങള്‍ പ്രയോഗവല്‍ക്കരിക്കുന്നതിനായി ഇത്തരം പരിഷ്‌ക്കാരങ്ങള്‍ അനിവാര്യമാണ്. മതാടിസ്ഥാനത്തിലുള്ള ചില നിയമങ്ങള്‍ ഉടലെടുത്ത കാലത്ത് എത്രമാത്രം പുരോഗമനപരമായിരുന്നെങ്കിലും ആധുനിക നീതി സങ്കല്‍പ്പങ്ങളനുസരിച്ച് അവയില്‍ പലതും കാലാനുസൃതമല്ല എന്ന് നാം തിരിച്ചറിയേണ്ടതുണ്ടെന്നും ബല്‍റാം തന്റെ ഫേസ്ബുക്ക് പോസ്റ്റില്‍ പറയുന്നു.
നേരത്തെ, കേന്ദ്രസര്‍ക്കാര്‍ ഏകീകൃത സിവില്‍ കോഡിനായി നിയമ വിദഗ്ധരില്‍ നിന്നും അഭിപ്രായം തേടിയിരുന്നു. എന്നാല്‍, അത് സാമുദായിക ധ്രുവീകരണത്തിന് ലക്ഷ്യം വെച്ചുള്ളതാണെന്നും അത്തരമൊരു ശ്രമം കേന്ദ്ര സര്‍ക്കാര്‍ നടത്തിയാല്‍ വലിയ പ്രശ്‌നങ്ങള്‍ക്കിടയാക്കുമെന്നുമാണ് മുസ്ലീം ലീഗ് കഴിഞ്ഞദിവസം വ്യക്തമാക്കിയിരുന്നത്.