കാക്കനാട്: മഴ കനത്തതോടെ കാക്കനാടും സമീപ പ്രദേശങ്ങളും വെളളക്കെട്ട് രൂക്ഷമായി. ശക്തമായ മഴയില്‍ കലക്ടറേറ്റ് പരിസരവും തൃക്കാക്കര നഗരസഭയുടെ പടിഞ്ഞാറന്‍ പ്രദേശങ്ങളും വെള്ളക്കെട്ടിലായി. കനകളും റോഡുകളും തിരിച്ചറിയാന്‍ കഴിയാത്ത വിധം ആയി. തൃക്കാക്കര പ്രദേശത്തെ വെള്ളം ഒഴുകി ചേരുന്ന ഇടപ്പള്ളി തോടും നിറഞ്ഞു.
മഴക്കുമുമ്പ് ചെയ്യേണ്ട മഴക്കാല പൂര്‍വ ശുചീകരണ പ്രവര്‍ത്തനങ്ങള്‍ പൂര്‍ത്തീകരിക്കാത്തതും വെള്ളക്കെട്ടിന് കാരണമായി. ഓടകളും തോടുകളും മാലിന്യങ്ങള്‍ കൊണ്ട് വെള്ളത്തിന്റെ ഒഴുക്ക് തടസപ്പെട്ടു. കൂടാതെ പഴയ കാലം മുതലുള്ള വലിയ തോടുകളെല്ലാം സ്വകാര്യ വ്യക്തികള്‍ കൈയേറി തോടുകളുടെ വിസ്തൃതൃതി ഇല്ലാതായതും വെള്ളം ഒഴുക്കില്ലാതായിട്ടുണ്ട്. ആറ് മീറ്റര്‍ വരെ വീതിയുള്ള പല പ്രധാന തോടുകളും കൈയേറ്റങ്ങള്‍ മൂലം വെറും ഓടകളായി മാറിയിരിക്കുകയാണ്.
ശക്തമായ കാറ്റില്‍ മരങ്ങള്‍ ഒടിഞ്ഞ് വീണ് വിവിധ സ്ഥലങ്ങളില്‍ കെ.എസ്.ഇ.ബി ലൈനുകള്‍ പൊട്ടി. കാക്കനാട് സുരഭി നഗറില്‍ എം.ഐ.ജി 39 ല്‍ ശോഭയുടെ വീട് ഭാഗികമായി തകര്‍ന്നു. സുരഭി നഗറില്‍ റോഡുവക്കില്‍ നിന്നിരുന്ന വാകമരം വീണാണ് വീട് ഭാഗികമായി തകര്‍ന്നത്. മരം വീണ് സമീപത്തെ വൈദ്യുത പോസ്റ്റിനും തകരാര്‍ സംഭവിച്ചു. അപകട സമയം റോഡില്‍ ആളില്ലാതിരുന്നത് വന്‍ അപകടം ഒഴിവായി.
തൃക്കാക്കര അഗ്‌നിശമന വിഭാഗം സ്ഥലത്തെത്തി. കാക്കനാട് വില്ലേജ് ഓഫിസര്‍ ഉദയകുമാര്‍, നഗര സഭ ചെയര്‍പേഴ്‌സന്‍ എം.ടി ഓമന, വാര്‍ഡ് കൗണ്‍സിലര്‍ ലിജി സുരേഷ്, കോണ്‍ഗ്രസ് നേതാവ് വി.ഡി സുരേഷ് എന്നിവരുടെ നേതൃത്വത്തില്‍ ക്രയിന്‍ കൊണ്ടുവന്ന് മണിക്കുറുകള്‍ നീണ്ട പരിശ്രമത്തിനൊടുവിലാണ് മരം വെട്ടിമാറ്റാനായത്. സുരഭി നഗര്‍ കാക്കനാട് പ്രദേശത്തെ വൈദുത ബന്ധം മണിക്കൂറുകളോളം തടസപ്പെട്ടു. കൂടാതെ നവോദയ, തെങ്ങോട്, തുതിയൂര്‍ ഇരുമ്പനം, കാക്കനാട് കെ.ബി.പി.എസിനു സമീപം തുടങ്ങിയ സ്ഥലങ്ങളില്‍ പ്രധാന റോഡിലേക്ക് മരം വീണ് ഗതാഗതം തടസമുണ്ടായി. നിര്‍ത്താതെ പെയ്യുന്ന മഴ രക്ഷാപ്രവര്‍ത്തനങ്ങള്‍ക്ക് തടസമായി.