കോട്ടയം: മുന്‍പ് ഒരു ചാനല്‍ അഭിമുഖത്തില്‍ സമദൂരനിലപാടാണ് കേരള കോണ്‍ഗ്രസ് സ്വീകരിച്ചിരുന്നത് എന്നാണ് താന്‍ പറഞ്ഞതെന്ന് കെ.എം മാണി. സമചിത്തതയോടെ സുധീരന്‍ ആ അഭിമുഖം വീണ്ടും കാണണം. വികാരാധീനനായി അപക്വമായ പ്രസ്താവനകള്‍ നടത്തുന്നതിന് മുന്‍പ് സുധീരന്‍ കാര്യങ്ങള്‍ വസ്തുനിഷ്ഠമായി പരിശോധിക്കണം. 43 വര്‍ഷം വിജയങ്ങളിലും പ്രതിസന്ധികളിലും യു.ഡി.എഫിനൊപ്പം നിലകൊണ്ട എന്റെമേല്‍ ചാഞ്ചാട്ട രാഷ്ട്രീയം ആരോപിച്ച സുധീരന്റെ നടപടി വിലകുറഞ്ഞതാണ്.
രാജ്യസഭാ സീറ്റിന്റെ കാര്യത്തില്‍ ഇതുവരെ ആരും ചിന്തിക്കാത്ത സാമുദായിക ധ്രുവീകരണം ആരോപിക്കാന്‍ സുധീരന്‍ കാണിക്കുന്ന അമിതാവേശം അദ്ദേഹത്തില്‍നിന്ന് കേരളം പ്രതീക്ഷിച്ചതല്ലെന്നും കെ.എം മാണി പറഞ്ഞു.