ജിദ്ദ: അന്താരാഷ്ട്ര വിമാന സര്‍വീസുകള്‍ റദ്ദാക്കിയതിനെ തുടര്‍ന്ന് യാത്രമുടങ്ങിയ ഫൈനല്‍ എക്‌സിറ്റിലും റീ എന്‍ട്രിയിലുമുള്ള വിദേശികള്‍ക്ക് അവരുടെ നാട്ടിലേക്ക് പോകാന്‍ വഴിയൊരുങ്ങുന്നു. 

ഇതിനായി സഊദി ആഭ്യന്തര മന്ത്രാലയം പുതിയ സംവിധാനം ഏർപ്പെടുത്തി. ‘ഔദ’ എന്ന പേരിലുള്ള പുതിയ സൗകര്യം നിലവിൽ എക്സിറ്റ് റീ എൻട്രി, എക്സിറ്റ് വിസ കയ്യിലുള്ളവർക്ക് ഉപയോഗപ്പെടുത്താം. സഊദി ജവാസത്തിന്‍റെ ‘അബ്ഷിർ’ വഴിയാണ് ഓൺലൈനായി ഇതിന് അപേക്ഷ നൽകേണ്ടത്. 

തിരുഗേഹങ്ങളുടെ സേവകന്‍ സല്‍മാന്‍ രാജാവിന്റെ നിര്‍ദേശപ്രകാരമാണ് നടപടി. 

അതേ സമയം ഇന്ത്യ അനുവദിച്ചാൽ പ്രവാസികൾക്ക് അടുത്ത മാസം ആദ്യവാരത്തിൽ പ്രത്യേക വിമാനങ്ങളിൽ നാട്ടിലേക്ക് പോകാനാകും.

എങ്ങനെ ആണ് അപേക്ഷ നൽക്കേണ്ടത്.

1.അബ്ഷീര്‍ പോര്‍ട്ടലില്‍ പ്രവേശിച്ച് ഔദ എന്ന പേരിലുള്ള ലിങ്കില്‍ ക്ലിക്ക് ചെയ്യുക.

2. ഈ ലിങ്കില്‍ ഇഖാമ, പാസ്പോര്‍ട്ട് വിവരങ്ങളും യാത്ര ചെയ്യാനുദ്ദേശിക്കുന്ന വിമാനത്താവളത്തിന്‍റേയും, നാട്ടിലിറങ്ങാന്‍ ഉദ്ദേശിക്കുന്ന വിമാനത്താവളത്തിന്റേയും വിവരങ്ങള്‍ ചേര്‍ക്കുക. എന്നിട്ട് അപേക്ഷ സമര്‍പ്പിക്കുക.

( റിയാദ് കിങ് ഖാലിദ്, ജിദ്ദ കിങ് അബ്ദുൽ അസീസ്, മദീന അമീർ മുഹമ്മദ് ബിൻ അബ്ദുൽ അസീസ്, ദമ്മാം കിങ് ഫഹദ് എന്നീ അന്താരാഷ്ട്ര വിമാനത്താവളങ്ങളില്‍ നിന്ന് മാത്രമേ ഇതുപ്രകാരം യാത്ര പോകാനാവൂ.) 

2. യാത്രക്കുള്ള അപേക്ഷ ആഭ്യന്തര മന്ത്രാലയം പരിശോധിക്കും. അനുമതി ലഭ്യമായാല്‍ യാത്രക്കുള്ള തിയ്യതിയും ടിക്കറ്റ് വിശദാംശങ്ങളും മൊബൈലില്‍ സന്ദേശമായി ലഭിക്കും. ഇത് പ്രകാരമുള്ള ടിക്കറ്റ് തുക അടക്കണം.

3. അബ്ഷീറില്‍ അക്കൗണ്ട് ലഭ്യമല്ലാത്തവര്‍ക്കും ഇത്തരത്തില്‍ നാട്ടില്‍ പോകാനുള്ള സേവനം ഉപയോഗപ്പെടുത്താം. ഇതിനായി ആദ്യം അബ്ഷീര്‍ രജിസ്ട്രേഷന്‍ പൂര്‍ത്തിയാക്കണം.

4.വിമാനത്താവളങ്ങള്‍ നില്‍ക്കുന്ന നഗരങ്ങളുടെ പരിധിക്ക് പുറത്ത് താമസിക്കുന്നവര്‍ എല്ലാ നടപടികളും പൂര്‍ത്തിയാക്കിയ ശേഷം വിമാനത്താവളത്തില്‍ യാത്രക്കായി എത്തിയാല്‍ മതി.