ചുള്ളിയോട്: സെവന്‍സ് മൈതാനങ്ങളിലെ വമ്പന്‍മാര്‍ കൊമ്പ് കോര്‍ക്കുന്ന ചുള്ളിയോട്ടെ ഗാന്ധി സ്മാരക സ്‌റ്റേഡിയം വൈകുന്നേരങ്ങളില്‍ നിറഞ്ഞ് കവിയുന്നു.
ഗാന്ധി സ്മാരക സ്‌പോര്‍ട്‌സ് അക്കാദമി സംഘടിപ്പിക്കുന്ന ആറാമത് ഫ്‌ളഡ് ലൈറ്റ് ഫൈവ്‌സ് ഫുട്‌ബോള്‍ മേള കാണാനായി ജില്ലയുടെ വിവിധഭാഗങ്ങളില്‍ നിന്നായി നൂറുകണക്കിന് പേരാണ് എത്തുന്നത്. വിദേശ താരങ്ങളടക്കമുള്ളവരെ ഇറക്കിയാണ് പ്രഗല്‍ഭ ടീമുകള്‍ മാറ്റുരക്കുന്നത്. വൈകിട്ട് ഏഴ് മണി മുതല്‍ ചുള്ളിയോട് ഗാന്ധി സ്മാരക സ്‌റ്റേഡിയത്തിലാണ് മത്സരങ്ങള്‍.
ദേശീയ, ജില്ലാ തല മത്സരങ്ങളും 16 വയസില്‍ താഴെയുള്ളവരുടേയും 12 വയസില്‍ താഴെയുള്ളവരുടേയും മത്സരമാണ് നടത്തുന്നത്. ദേശീയ മത്സരത്തില്‍ ഒന്നാം സ്ഥാനം നേടുന്നവര്‍ക്ക് ഒരു ലക്ഷം രൂപയും രണ്ടാം സ്ഥാനക്കാര്‍ക്ക് 75000 രൂപയുമാണ് സമ്മാനം. ജില്ലാ മത്സരത്തില്‍ ഒന്നാം സ്ഥാനക്കാര്‍ക്ക് 10000 രൂപയും സ്വര്‍ണക്കപ്പും രണ്ടാം സ്ഥാനക്കാര്‍ക്ക് 5000 രൂപയും വെള്ളിക്കപ്പും നല്‍കും.
അമ്പതോളം ടീമുകളാണ് മത്സരത്തില്‍ പങ്കെടുക്കുന്നത്. ഇതുവരെ നടന്ന കളിയില്‍ ടൗണ്‍ ടീം അരീക്കോട്, എഫ്.സി മഞ്ചേരി എന്നിവര്‍ സെമി ഫൈനല്‍ ഉറപ്പിച്ചു. ഫിഫ മഞ്ചേരി, എ.വൈ.സി. ഉച്ചാരക്കടവ്, മെഡി ഗാര്‍ഡ് അരീക്കോട്, അല്‍മദീന ചെര്‍പ്പുളശേരി, മര്‍വ കാലിക്കറ്റ്, നോവ അരപ്പറ്റ എന്നിവരാണ് മാറ്റുരക്കുന്ന പ്രധാന ടീമുകള്‍.