മട്ടന്നൂര്‍: നഗരത്തിലേക്ക് ചരക്കുമായെത്തിയ ലോറി എയര്‍ ബ്രേക്ക്ഡൗണായി നടുറോഡില്‍ കുടുങ്ങിയത് വാഹനങ്ങള്‍ക്കും യാത്രക്കാര്‍ക്കും വിനയായി. ഇന്നലെ രാവിലെ 10 ഓടെയാണ് മട്ടന്നൂര്‍-കണ്ണൂര്‍ റൂട്ടില്‍ മട്ടന്നൂര്‍ ജങ്ഷനു സമീപത്താണ് ലോറി കുടുങ്ങിയത്. മഹാരാഷ്ട്രയില്‍ നിന്ന് ഉള്ളിയുമായി മട്ടന്നൂരിലെത്തിയ ലോറിയാണ് ബ്രേക്ക് ഡൗണായത്. ഇരിട്ടി റൂട്ടില്‍ കോടതി സ്‌റ്റോപ്പ് വരെയും കണ്ണൂര്‍ റൂട്ടില്‍ വായന്തോട് വരെയും ഗതാഗതക്കുരുക്ക് അനുഭവപ്പെട്ടു. ഇതേസമയം തന്നെ രോഗിയെയും വഹിച്ച് ആംബുലന്‍സ് കൂടി ഈ കുരുക്കില്‍പെട്ടതോടെ നാട്ടുകാര്‍ അങ്കലപ്പിലായി. ഒരു ഹോം ഗാര്‍ഡ് മാത്രം ഉണ്ടായിരുന്നത്. തുടര്‍ന്ന് കൂടുതല്‍ പൊലിസ് സ്ഥലത്തെത്തി വാഹനങ്ങളെ നിയന്ത്രിച്ചു. ജെ.സി.ബി ഉപയോഗിച്ചു ലോറിയെ മാറ്റാന്‍ ശ്രമിച്ചെങ്കിലും ശ്രമം വിഫലമായി. തുടര്‍ന്ന് ഉച്ചയോടെയാണ് ലോറി മാറ്റി ഗതാഗതം പൂര്‍വസ്ഥിതിയിലാക്കിയത്.