കോഴിക്കോട്: ജില്ലയിലെ വിദ്യാര്‍ഥികള്‍ക്കും അധ്യാപകര്‍ക്കും ശുദ്ധജലം വിതരണം ചെയ്യുന്ന പദ്ധതിയുമായി സേവ് (സ്റ്റുഡന്റ് ആര്‍മി ഫോര്‍ വിവിഡ് എന്‍വയണ്‍മെന്റ്). 'നല്ല വെള്ളം, നല്ല പാത്രം' എന്ന പദ്ധതിയാണ് ഈ അധ്യായന വര്‍ഷം നടപ്പാക്കുക.
ജലജന്യ രോഗങ്ങളും വൃക്കരോഗങ്ങളും പെരുകുന്ന സാഹചര്യത്തില്‍ കുടിവെള്ളം ശുദ്ധിയോടെ ഉപയോഗിക്കേണ്ടതിന്റെ പ്രാധാന്യത്തെക്കുറിച്ച് കുട്ടികളില്‍ ബോധവല്‍ക്കരണം നടത്തും. നിലവില്‍ ഭൂരിപക്ഷം വിദ്യാര്‍ഥികളും പ്ലാസ്റ്റിക് വാട്ടര്‍ ബോട്ടിലുകളാണ് ഉപയോഗിക്കുന്നത്. പലരും ഇതില്‍ ചൂടുവെള്ളം ഒഴിച്ചാണ് ഉപയോഗിക്കുന്നത്. ഇവ ഉപേക്ഷിച്ച് സ്റ്റീല്‍, പളുങ്ക് വാട്ടര്‍ ബോട്ടിലുകള്‍ ഉപയോഗിക്കാന്‍ പ്രേരിപ്പിക്കും.
പദ്ധതിയുടെ ജില്ലാതല ഉദ്ഘാടനം മാനാഞ്ചിറ ഗവ. ടി.ടി.ഐ യു.പി സ്‌കൂളില്‍ നടക്കും. സ്‌കൂളിലെയും ടി.ടി.ഐയിലെയും മുഴുവന്‍ വിദ്യാര്‍ഥികളും അധ്യാപകരും മറ്റു ജീവനക്കാരും സ്റ്റീല്‍വാട്ടര്‍ ബോട്ടിലുകളിലേക്കു മാറിയതിനു ശേഷമാകും ഇതു നടത്തുക.