നീലേശ്വരം:  മാഹിമദ്യം കടത്തുന്നതിനിടെ എക്‌സൈസ് സംഘത്തെ വെട്ടിച്ചു കടന്ന പ്രതി പിടിയില്‍. നീലേശ്വരം തോട്ടുംപുറത്തെ എം.വി സജീവനെയാണു നീലേശ്വരം എക്‌സൈസ് റേഞ്ച് അസി. എക്‌സൈസ് ഇന്‍സ്‌പെക്ടര്‍ പി ഗോവിന്ദനും സംഘവും അറസ്റ്റു ചെയ്തത്. ആഴ്ചകള്‍ക്കു മുന്‍പു 90 ലിറ്റര്‍ മാഹി മദ്യം കടത്തുന്നതിനിടെയാണു സജീവന്‍ എക്‌സൈസ് സംഘത്തെ വെട്ടിച്ചു കടന്നത്. സിവില്‍ എക്‌സൈസ് ഓഫിസര്‍മാരായ പി.കെ ബാബുരാജ്, പി സുരേശന്‍, കെ.ആര്‍ പ്രജിത്ത്, പി അനീഷ് എന്നിവരാണു സംഘത്തിലുണ്ടായിരുന്നത്. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു. ജില്ലയ്ക്കകത്തും പുറത്തും വേറെയും എക്‌സൈസ് കേസുകളിലെ പ്രതിയാണു  സജീവന്‍.
സ്‌കൂട്ടറില്‍ കടത്തുകയായിരുന്ന ഒന്‍പതു ലിറ്റര്‍ വിദേശമദ്യവുമായി ചെറുവത്തൂര്‍ കൈതക്കാട്ടെ എം രജീഷ് (35), നാലു ലിറ്റര്‍ വിദേശമദ്യവുമായി ചാനടുക്കത്തെ പി മാധവന്‍ എന്നിവരെയും നീലേശ്വരം എക്‌സൈസ് റേഞ്ച് അറസ്റ്റ് ചെയ്തു. യഥാക്രമം പി ഗോവിന്ദന്‍, അസി.എക്‌സൈസ് ഇന്‍സ്‌പെക്ടര്‍ എം സുകുമാരന്‍ എന്നിവരുടെ നേതൃത്വത്തിലുള്ള സംഘമാണ് ഇരുവരെയും പിടികൂടിയത്.