കൊല്ലം: കൊല്ലത്ത് കഴിഞ്ഞദിവസം കാണാതായത് പത്ത് പെണ്‍കുട്ടികളെ. കാണാതായ പെണ്‍കുട്ടികളില്‍ രണ്ടുപേര്‍ ലൈംഗികാതിക്രമത്തിനും ഇരയായതായി പൊലിസ് കണ്ടെത്തി. സംഭവത്തില്‍ കടുത്ത സമ്മര്‍ദ്ദത്തിലായ പൊലിസ് രണ്ട് വിദ്യാര്‍ഥിനികളെ കണ്ടെത്തുകയും മറ്റുള്ളവര്‍ സുരക്ഷിതരാണെന്ന് സ്ഥിരീകരിക്കുകയും ചെയ്തു.
കാണാതായ മറ്റ് പെണ്‍കുട്ടികള്‍ കാമുകന്മാര്‍ക്കൊപ്പം ഉണ്ടെന്നാണ് പൊലിസ് കണ്ടെത്തിയിരിക്കുന്നത്. ഇവരെ കണ്ടെത്താനുള്ള അന്വേഷണത്തിലാണ് പൊലിസ്. പെണ്‍കുട്ടികള്‍ ലൈംഗികാതിക്രമത്തിന് ഇരയായ രണ്ട് സംഭവങ്ങളില്‍ പോക്‌സോ നിയമ പ്രകാരം കേസെടുത്ത് പ്രതികളെ അറസ്റ്റ് ചെയ്തിട്ടുണ്ട്. ലൈംഗികാതിക്രമത്തിന് ഇരയായ രണ്ട് പെണ്‍കുട്ടികളും സ്‌കൂളിലെത്തിയിട്ടില്ലെന്ന വിവരം ഉടന്‍ സ്ഥിരീകരിക്കാന്‍ പൊലിസിന് കഴിഞ്ഞിരുന്നില്ല.
ചില സ്‌കൂളുകളില്‍ കുട്ടികള്‍ മുങ്ങുന്നത് തടയാന്‍ ഹാജരെടുത്ത് രക്ഷിതാക്കളെ വിവരം അറിയിക്കുന്ന രീതിയുണ്ട്. എന്നാല്‍ എല്ലായിടത്തും ഈ സംവിധാനം നിലവിലില്ലാത്തതും പ്രശ്‌നമാകുന്നുണ്ട്.
സ്‌കൂളുകള്‍ കേന്ദ്രീകരിച്ചുള്ള പൊലിസിന്റെ ബോധവല്‍ക്കരണ പരിപാടിയില്‍ സജീവമായിരുന്ന ഒരു പെണ്‍കുട്ടി സ്‌കൂളിലെത്താത്തതിനാല്‍ ബന്ധപ്പെട്ട പൊലിസുകാര്‍ നടത്തിയ അന്വേഷണത്തിലാണ് കുട്ടിയെ കാണാനില്ലെന്ന വിവരം ലഭിച്ചത്. ഇരവിപുരം പൊലിസ് അന്വേഷിച്ച് കണ്ടെത്തിയ പെണ്‍കുട്ടി ലൈംഗികാതിക്രമത്തിന് ഇരയായതായി കണ്ടെത്തിയിട്ടുണ്ട്. ഇരവിപുരം കൂടാതെ ചടയമംഗലം, കുണ്ടറ, ശാസ്താംകോട്ട, കൊട്ടാരക്കര, പുനലൂര്‍, കുന്നിക്കോട്, അഞ്ചല്‍, ഏരൂര്‍ പൊലിസ് സ്‌റ്റേഷനുകളിലാണ് പെണ്‍കുട്ടികളെ കാണാതായ കേസുകള്‍ രജിസ്റ്റര്‍ ചെയ്തത്.
പോക്‌സോ നിയമ പ്രകാരം അറസ്റ്റിലായ 19 കാരനും 21 കാരനും ബന്ധുവീടുകളിലാണ് കുട്ടികളുമായി പോയത്.
ഇവര്‍ക്ക് ബന്ധുക്കളുടെ സഹായം ലഭിച്ചതായും പൊലിസ് സംശയിക്കുന്നു. ഇരവിപുരത്ത് കൗമാരക്കാരി ലൈംഗികാതിക്രമത്തിന് ഇരയായ സംഭവത്തില്‍ പ്രതിയായ കൗമാരക്കാരന്റെ ബന്ധുവാണ് പൊലിസിനെ വിവരം അറിയിച്ചത്.