പാവറട്ടി: പത്ത് പൊതി കഞ്ചാവുമായി പതിനെട്ടുകാരന്‍ പിടിയിലായി. കുന്നത്തുള്ളി വീട്ടില്‍ യദുകൃഷ്ണനെയാണ് വാടാനപ്പള്ളി എക്‌സൈസ് ഇന്‍സ്‌പെക്ടര്‍ എം.നൗഷാദിന്റെ നേതൃത്വത്തിലുള്ള സംഘം മുല്ലശ്ശേരി താണവീഥിയില്‍ നിന്ന് പിടികൂടിയത്. കഴിഞ്ഞ കുറച്ച് നാളുകളായി പ്രദേശത്തെ വിദ്യാര്‍ഥികള്‍ക്കിടയില്‍ കഞ്ചാവ് സുലഭമായി ലഭിക്കുന്നുണ്ടെന്ന് ഗ്രാമപഞ്ചായത്ത് കമ്മിറ്റിയുടെയും നാട്ടുകാരുടെയും പരാതിയുടെ അടിസ്ഥാനത്തില്‍ നടത്തിയ അന്വേഷണത്തിലാണ് യദുകൃഷ്ണ പിടിയിലായത്. മുമ്പ് സ്‌കൂളില്‍ സിഗരറ്റും മറ്റു ലഹരി വസ്തുക്കളും ഉപയോഗിച്ചതിന് സ്‌കൂളില്‍ നിന്ന് പുറത്താക്കിയിരുന്നു. കേസ് രജിസ്റ്റര്‍ ചെയ്ത് വാടാനപ്പള്ളി എക്‌സൈസ് റേഞ്ച് ഓഫീസില്‍ ഹാജരാക്കി.
പ്രതിക്ക് കഞ്ചാവ് നല്‍കിയ വരെയും പ്രതിയുടെ കയ്യില്‍ നിന്നും കഞ്ചാവ് വാങ്ങുന്നവരെയും പിടികൂടുന്നതിനുള്ള അന്വേഷണത്തിലാണ് എക്‌സൈസ് സംഘം. റെയിഡില്‍ പ്രിവന്റീവ് ഓഫിസര്‍ വിപിന്‍, സിവില്‍ എക്‌സൈസ് ഓഫിസര്‍മാരായ സി.ആര്‍ ആന്റണി, കണ്ണന്‍ എന്നിവരും അന്വേഷണ സംഘത്തിലുണ്ടായിരുന്നു.