കരുളായി: വാഹനത്തിനു സൈഡ് കൊടുക്കാത്തതിനെ തുടര്‍ന്നുണ്ടായ തര്‍ക്കത്തെ തുടര്‍ന്ന് യുവാവ് കുത്തേറ്റു മരിച്ചു. മൂത്തേടം വെള്ളാരമുണ്ടണ്ട വട്ടപ്പാടം കുഞ്ഞിമുഹമ്മദിന്റെ മകന്‍ കോര്‍മത്ത് മുഹമ്മദ് ഷബീര്‍(22) ആണ് മരിച്ചത്. ഇന്നലെ ഉച്ചയ്ക്ക് ഒന്നരയോടെ കരുളായി പിലാക്കോട്ടുപാടത്താണ് സംഭവം. സംഭവത്തിലെ പ്രതികളായ കരുളായി കൊളവട്ടം സ്വദേശി പണിക്കേവീട്ടില്‍ മുനീര്‍, കരുളായി പിലാക്കോട്ടുപാടം താഴത്തേപീടിക റസാഖ്, മുഹസീര്‍ എന്നിവര്‍ പൊലിസ് സ്റ്റേഷനില്‍ കീഴടങ്ങി.

കാറിനു സൈഡ് നല്‍കാത്തതുമായി ബന്ധപ്പെട്ട് കഴിഞ്ഞദിവസം കരുളായി വാരിക്കല്‍ പ്രദേശത്തുള്ള യുവാക്കളും പ്രതികളും തമ്മില്‍ തര്‍ക്കവും അടിപിടിയുമുണ്ടായിരുന്നു. ഇതില്‍ പരുക്കേറ്റവരെ നിലമ്പൂര്‍ ജില്ലാ ആശുപത്രിയില്‍ പ്രവേശിപ്പിക്കുകയും പൊലിസിന്റെ മധ്യസ്ഥതയില്‍ പ്രശ്‌നം ഒത്തുതീര്‍പ്പാക്കുകയും ചെയ്തിരുന്നു. എന്നാല്‍, ഇവരില്‍ ഒരു സംഘം ഇന്നലെ പിലാക്കോട്ടുപാടം യത്തീംഖാനയുടെ മുന്നില്‍വച്ച് പ്രതികള്‍ സഞ്ചരിച്ചിരുന്ന കാറ് വീണ്ടും തടയുകയായിരുന്നു. ഇതിനിടെയാണ് ഷബീറിന് കുത്തേറ്റതെന്നു പൊലിസ് പറഞ്ഞു. പ്രതിയായ മുനീറിനും പരിക്കേറ്റിട്ടുണ്ട്. ഷബീറിനു കുത്തേറ്റതോടെ സംഘാംഗങ്ങള്‍ ചിതറിയോടിയിരുന്നു. തുടര്‍ന്നു സംഘത്തില്‍പ്പെട്ട ഒരാള്‍ കുത്തേറ്റ ഷബീറിനെ ബൈക്കില്‍ ആശുപത്രിയില്‍ കൊണ്ടണ്ടുപോകാന്‍ ശ്രമിച്ചെങ്കിലും അവശനായി റോഡിലേക്കു മറിഞ്ഞുവീണു. തുടര്‍ന്നു നാട്ടുകാരാണ് നിലമ്പൂര്‍ ജില്ലാ ആശുപത്രിയിലെത്തിച്ചത്.
മൃതദേഹം പോസ്റ്റ്‌മോര്‍ട്ടത്തിനായി കോഴിക്കോട് മെഡിക്കല്‍ കോളജിലേക്കു മാറ്റി. ജില്ലാ പൊലിസ് മേധാവി ദേബേഷ്‌കുമാര്‍ ബെഹ്‌റ, പെരിന്തല്‍മണ്ണ ഡിവൈ.എസ്.പി പി.ടി ബാലന്‍ എന്നിവര്‍ ജില്ലാ ആശുപത്രിയും സംഭവസ്ഥലവും സന്ദര്‍ശിച്ചു. ഫോറന്‍സിക്, വിരലടയാള വിദഗ്ധര്‍ സംഭവസ്ഥലത്തെത്തി തെളിവെടുപ്പുനടത്തി. കരുളായിയിലെ തുണിക്കടയിലെ സെയില്‍സ്മാനായിരുന്നു കൊല്ലപ്പെട്ട ഷബീര്‍. മാതാവ്: മുണ്ടേ@ാടന്‍ സക്കീന. സഹോദരങ്ങള്‍ സജ്‌ന, ഷഫീഖ്, ഷഹിന.