തെല്‍ അവീവ്: ഇറാനെതിരെ ഇസ്‌റാഈല്‍ വ്യോമാക്രമണം നടത്തുമ്പോള്‍  പ്രധാനമന്ത്രി ബെഞ്ചമിന്‍ നെതന്യാഹുവും പ്രതിരോധ മന്ത്രി യോവ് ഗാലന്റും മുതിര്‍ന്ന ഉദ്യോഗസ്ഥരും ബങ്കറില്‍ ഒളിച്ചിരിക്കുകയായിരുന്നു.  ഇറാന്റെ ഭാഗത്തുനിന്നു തിരിച്ചടി പേടിച്ച് സുരക്ഷിത ഇടങ്ങളിലേക്ക് മാറുകയായിരുന്നു രാജ്യത്തലവന്‍മാര്‍. നെതന്യാഹുവിനും മറ്റ് മുതിര്‍ന്ന ഉദ്യോഗസ്ഥര്‍ക്കുമായി ബങ്കറുകള്‍ തയ്യാറാക്കി വെക്കാന്‍ സുരക്ഷാ ഉദ്യോഗസ്ഥര്‍ നിര്‍ദ്ദേശിച്ചതായി ടൈംസ് ഓഫ് ഇസ്‌റാഈല്‍ റിപ്പോര്‍ട്ട് ചെയ്യുന്നു.

അതേസമയം, ഗാലന്റിനും മുതിര്‍ന്ന സൈനിക ഉദ്യോഗസ്ഥര്‍ക്കുമൊപ്പം നെതന്യാഹു ഇറാന്‍ ആക്രമണം വിലയിരുത്തുന്നുവെന്ന തരത്തില്‍ ഒരു ചിത്രം പ്രധാനമന്ത്രിയുടെ ഓഫിസ് പുറത്തുവിട്ടിട്ടുണ്ട്. ഇരു നേതാക്കളും മുതിര്‍ന്ന സൈനിക ഉദ്യോഗസ്ഥരും തെല്‍ അവീവിലെ പ്രതിരോധ മന്ത്രാലയത്തിലെ ബങ്കറിലാണ് കഴിഞ്ഞതെന്ന് ഇസ്‌റാഈല്‍ മാധ്യമമായ 'ഇസ്രായേല്‍ ഹായോമി'നെ ഉദ്ധരിച്ച് 'അല്‍ജസീറ' റിപ്പോര്‍ട്ട് ചെയ്യുന്നു. കിര്‍യയിലുള്ള സൈനിക താവളത്തിലെ ബങ്കറുകളിലാണ് ഇവര്‍ ഇന്നു പുലര്‍ച്ചെ കഴിഞ്ഞതെന്ന തരത്തിലും റിപ്പോര്‍ട്ടുകളുണ്ട്.

പ്രാദേശിക സമയം പുലര്‍ച്ചെ 2.15 ഓടെയാണ് ഇസ്‌റാഈല്‍ ആക്രമണമുണ്ടായത്.  ഇസ്‌റാഈല്‍ സൈനിക മേധാവി ലെഫ്. ജനറല്‍ ഹെര്‍സി ഹാലെവിയാണ് ഇറാന്‍ നഗരങ്ങളെ ലക്ഷ്യമിട്ടുള്ള വ്യോമാക്രമണത്തിനു മേല്‍നോട്ടം വഹിച്ചതെന്ന് 'ടൈംസ് ഓഫ് ഇസ്‌റാഈല്‍' റിപ്പോര്‍ട്ട് ചെയ്തു. ഇസ്‌റാഈല്‍ വ്യോമസേന(ഐഎഎഫ്) മേധാവി മേജര്‍ ജനറല്‍ ടോമര്‍ ബാറും ഒപ്പമുണ്ടായിരുന്നു. തെല്‍ അവീവിലെ കിര്‍യയിലുള്ള സൈനിക താവളത്തിലെ ഐഎഎഫ് കമാന്‍ഡ് കേന്ദ്രത്തില്‍ ഇരുന്ന് ഇരുവരും ആക്രമണനീക്കങ്ങള്‍ നിരീക്ഷിക്കുന്നതിന്റെ ദൃശ്യം ഇസ്‌റാഈല്‍ സൈന്യം പുറത്തുവിട്ടുണ്ട്.