കൊല്ലം: അഞ്ചലില്‍ കാറിന് സൈഡ് നല്‍കിയില്ല എന്ന കാരണത്താല്‍ തന്നെ അപമാനിക്കാന്‍ ശ്രമിക്കുകയും മകനെ മര്‍ദിക്കുകയും ചെയ്ത കെ.ബി ഗണേഷ് കുമാര്‍ എം.എല്‍.എക്കെതിരായ കേസില്‍ പരാതിക്കാരിയായ ഷീനയുടെ മൊഴി ഇന്നലെ ചവറ ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതി രേഖപ്പെടുത്തി.
ഉച്ചക്ക് 2.15ഓടെ എത്തിയ ഷീന 2.30 ഓടെ മജിസ്‌ട്രേറ്റ് പ്രസന്നയുടെ മുന്നിലെത്തി രഹസ്യ മൊഴി രേഖപ്പെടുത്തി. താന്‍ നേരത്തെ എം.എല്‍.എക്കെതിരേ പറഞ്ഞ കാര്യത്തില്‍ തന്നെ ഉറച്ച് നില്‍ക്കുന്നുവെന്ന് മൊഴി രേഖപ്പെടുത്തിയ ശേഷം ഷീന മാധ്യമ പ്രവര്‍ത്തകരോട് പറഞ്ഞു. ഭര്‍ത്താവുമൊത്താണ് ഷീന കോടതിയിലെത്തിയത്. ഏകദേശം ഒന്നര മണിക്കൂറോളമാണ് മൊഴി രേഖപ്പെടുത്തല്‍ നീണ്ടുനിന്നത്.
ഇതിനിടയില്‍ സംഭവത്തില്‍ ഗണേഷ്‌കുമാര്‍ എം.എല്‍.എയുടെ പങ്ക് വെളിവാക്കുന്ന ദൃക്‌സാക്ഷിമൊഴി പുറത്തുവന്നു.
യുവാവും എം.എല്‍.എയും തമ്മില്‍ തര്‍ക്കമുണ്ടായെന്ന് അഞ്ചല്‍ സ്വദേശി ബേബി കളിയിക്കല്‍ പൊലിസില്‍ മൊഴി നല്‍കി. തന്റെ മകനെ ആക്രമിച്ചത് എന്തിനാണെന്ന് മാതാവ് ഷീന ചോദിക്കുന്നത് കേട്ടെന്ന് ബേബി പറയുന്നു.
ഗണേഷ്‌കുമാറിന്റെ കാറും മര്‍ദനമേറ്റ അനന്തകൃഷ്ണന്റെ കാറും മുഖാമുഖം വന്നുവെന്നും എം.എല്‍.എയുടെ കാര്‍ അല്‍പം പിന്നിലേക്ക് മാറ്റിയാല്‍ മാത്രമേ രണ്ട് വാഹനങ്ങള്‍ക്കും കടന്നു പോകാന്‍ സാധിക്കുമായിരുന്നുള്ളൂവെന്നും അനന്തകൃഷണന്‍ തന്റെ കാര്‍ ഏറെ പണിപ്പെട്ട് സമീപത്തെ വീട്ടിലേക്ക് മാറ്റുകയും ഗണേഷ്‌കുമാറിന് വഴിയൊരുക്കുകയും ചെയ്തയായും ബേബി പറഞ്ഞു.