കൊണ്ടോട്ടി: ചെറുകാവിലെ പെരിങ്ങാവ് കൊടുപ്പുറത്ത് പ്രവര്‍ത്തിക്കുന്ന എംസാന്‍ഡ് ക്രഷര്‍ യൂനിറ്റ് നാട്ടുകാര്‍ക്ക് ഭീഷണിയാകുന്നു. കഴിഞ്ഞ ദിവസം പെയ്ത മഴയില്‍ ക്രഷറിന്റെ മതിലിടിഞ്ഞും ചെളിവെള്ളം പുറത്തേക്ക് ഒഴുകിയുമാണ് പ്രദേശത്ത് ജീവിതം താറുമാറായത്. ശക്തമായ മഴയില്‍ മതില്‍ ഇടിഞ്ഞു വീണ് മലിന ജലം ജനവാസ സ്ഥലത്തേക്ക് പരന്നൊഴുകുകയായിരുന്നു.
മേലായി ബാബുരാജ്, മേലായി സജിത്ത്, ചെറാതൊടി ഷാഫി, ചെറാതൊടി കുഞ്ഞിമുഹമ്മദ് എന്നിവരുടെ വീടുകളാണ് ഇതോടെ ഭീഷണിയിലായത്. ഇവരുടെ കിണറുകളില്‍ ക്രഷര്‍ പൊടി അടങ്ങിയ ചെളി വെള്ളം നിറഞ്ഞ് ഉപയോഗശൂന്യമായി. അശാസ്ത്രീയ രീതിയിലുള്ള മതില്‍ നിര്‍മാണമാണ് ഇതിനു കാരണമായതെന്നു നാട്ടുകാര്‍ പറയുന്നു. ചെറുകാവ് വില്ലേജ് ഓഫിസര്‍, പഞ്ചായത്ത് വൈസ് പ്രസിഡന്റ്, ഡെപ്യൂട്ടി തഹസില്‍ദാര്‍, വാര്‍ഡ് അംഗം എന്നിവര്‍ സ്ഥലം സന്ദര്‍ശിച്ചു.
പ്രദേശവാസികളുടെ പരാതിയെ തുടര്‍ന്ന് എംസാന്‍ഡ് നടത്തിപ്പുകാരോട് പ്രവര്‍ത്തനം നിര്‍ത്തിവയ്ക്കാനും ഭൂമി അളന്ന് തിട്ടപ്പെടുത്തി മാലിന്യം നീക്കം ചെയ്യാനും ആവശ്യപ്പെട്ടിരുന്നു.എന്നാല്‍ ക്രഷര്‍ നടത്തിപ്പുകാര്‍ ഇതിന് മുതിരാതെ ചെറിയ പെരുന്നാള്‍ ദിനത്തില്‍ സമീപത്തെ സ്വാകര്യ ഭൂമിയില്‍ കുഴിയെടുത്ത് മണ്ണുമാന്ത്രി യന്ത്രം ഉപയോഗിച്ച് മാലിന്യം മൂടാന്‍ ശ്രമിക്കുകയായിരുന്നു. ഇതോടെ പ്രദേശവാസികള്‍ സംഘടിച്ച് പ്രവൃത്തി തടഞ്ഞു. പിന്നീട് വാഴയൂര്‍ വില്ലേജ് ഓഫിസറും, കൊണ്ടോട്ടി പൊലിസും എത്തിയതോടെയാണ് രംഗം ശാന്തമാക്കിയത്.
ക്രഷറിനെതിരെ വാര്‍ഡ് സഭയില്‍ പ്രമേയം പാസാക്കി പഞ്ചായത്തിനെ സമീപിച്ച് പ്രവര്‍ത്തനം നിര്‍ത്തിവച്ചിരുന്നു. എന്നാല്‍ പഞ്ചായത്ത്, മലിനീകരണ ബോര്‍ഡുകളെ സ്വാധീനിച്ച് യൂനിറ്റ് വീണ്ടും പ്രവര്‍ത്തിപ്പിക്കുകയായിരുന്നുവെന്ന് നാട്ടുകാര്‍ പറഞ്ഞു.പ്രശ്‌നത്തിന് പരിഹാരം കണ്ടില്ലെങ്കില്‍ ക്രഷറിനെതിരേ പ്രത്യക്ഷ സമരം നടത്താനുള്ള ഒരുക്കത്തിലാണ് പ്രദേശവാസികള്‍.