കോതമംഗലം:  മതേതരത്വസംരക്ഷകനും തൊഴിലാളിവര്‍ഗ സ്‌നേഹിയുമായിരുന്നു കെ കരുണാകരന്‍ എന്ന് ഡി.സി.സി ജനറല്‍ സെക്രട്ടറി അബു മൊയ്തീന്‍.
ഐ.എന്‍.ടി.യു.സി കോതമംഗലം റീജിയണല്‍ കമ്മിറ്റി കോണ്‍ഗ്രസ് ഭവനില്‍ നടത്തിയ ലീഡര്‍ കെ കരുണാകരന്റെ ജന്മദിനാഘോഷം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ഐ.എന്‍.ടി.യു.സി യൂനിയന്‍ കെട്ടിപ്പടുക്കുന്നതിന് ത്യാഗോജ്വല പ്രവര്‍ത്തനം നടത്തിയ നേതാവായിരുന്നു കരുണാകരനെന്നും അദ്ദേഹം പറഞ്ഞു. ഐ.എന്‍.ടി.യു.സി റീജിയണല്‍ സെക്രട്ടറി റോയി കെ പോള്‍ അധ്യക്ഷത വഹിച്ചു.  കവളങ്ങാട് കോണ്‍ഗ്രസ് പ്രസിഡന്റ് എബി എബ്രഹാം, പി.സി ജോര്‍ജ്, പി.എ പാദുഷ, ശശി കുഞ്ഞുമോന്‍, ബാബു ഏലിയാസ്, സലിം മംഗലപ്പാറ, ബേബി സേവ്യര്‍, സി.വി ജോസ്, ബൈജു ജേക്കബ് എന്നിവര്‍ പ്രസംഗിച്ചു.