എരുമപ്പെട്ടി: കടബാധ്യത മൂലം ആത്മഹത്യ ചെയ്ത കടങ്ങോട് കൊട്ടിലിപ്പറമ്പില്‍ സുരേഷ് കുമാറിന്റെ മകള്‍ വൈഷ്ണവിയുടെ സര്‍ക്കാര്‍ ഏറ്റെടുത്ത വിദ്യാഭ്യാസ ചിലവിന്റെ നടപടികള്‍ ആരംഭിച്ചു. വ്യവസായ കായിക വകുപ്പ് മന്ത്രി എ.സി മൊയ്തീന്‍ ഇടപ്പെട്ടതിനെ തുടര്‍ന്നാണ് വൈഷ്ണവിയുടെ വിദ്യാഭ്യാസ ചെലവ് സര്‍ക്കാര്‍ ഏറ്റെടുക്കാന്‍ തീരുമാനമായത്. ഇതിനെ തുടര്‍ന്ന് പൊതുവിദ്യാഭ്യാസ വകുപ്പിന്റെ നിര്‍ദ്ദേശപ്രകാരം അടിയന്തിര ഫോണ്‍ സന്ദേശം ലഭിക്കുകയും ഡി.ഡി.ഇ കെ.സുമതി, എ.ഇ.ഒ പി.സച്ചിദാനന്ദന്‍ എന്നിവരുടെ നേതൃത്വത്തിലുള്ള സംഘം സ്ഥലം സന്ദര്‍ശിച്ചു. വൈഷ്ണവി പഠനം നടത്തുന്ന കടങ്ങോട് പാറപ്പുറം ഗവ: എല്‍.പി സ്‌കൂളിലെത്തി സംഘം റിപ്പോര്‍ട്ട് എടുത്തിട്ടുണ്ട്. വാര്‍ഡ് മെമ്പര്‍ സൗമ്യ സുരേഷ്, പ്രധാന അധ്യാപിക വി.കെ ബീന, എം.പി.ടി.എ പ്രസിഡന്റ് കാഞ്ചന മോഹന്‍ തുടങ്ങിയവര്‍ സംഘത്തോടൊപ്പമുണ്ടായിരുന്നു.