പുല്‍പ്പള്ളി: വരള്‍ച്ച രൂക്ഷമായതോടെ പുല്‍പ്പള്ളി, മുള്ളന്‍കൊല്ലി പഞ്ചായത്തുകളില്‍ കടുത്ത ജലക്ഷാമവും കാര്‍ഷിക വിളകള്‍ കരിഞ്ഞുണങ്ങുകയും ചെയ്തിട്ടും പ്രതിരോധ പ്രവര്‍ത്തനങ്ങള്‍ക്ക് ആവശ്യമായ നടപടികള്‍ സ്വീകരിക്കുന്നില്ലെന്ന് പരാതി. ജനങ്ങള്‍ അനുഭവിക്കുന്ന വരള്‍ച്ച കെടുതികള്‍ കേന്ദ്ര-സംസ്ഥാന സര്‍ക്കാരുകളിലെത്തിക്കുന്നതിനും ജനപ്രതിനിധികള്‍ തയാറാകുന്നില്ലെന്ന് ആക്ഷേപം ഉയര്‍ന്നിട്ടുണ്ട്. വേനല്‍ ചൂട് ശക്തമായതോടെ കിണറുകളും കുളങ്ങളും കുഴല്‍കിണറുകളും വറ്റി. ഇതിന് പുറമെ കാര്‍ഷിക വിളകളായ കുരുമുളക്, കാപ്പി, ഏലം, കമുക്, വാഴ, തെങ്ങ് തുടങ്ങിയ വിളകള്‍ കരിഞ്ഞുണങ്ങാന്‍ തുടങ്ങിയിട്ടും വരള്‍ച്ച പ്രതിരോധത്തിനാവശ്യമായ ഒരു നടപടിയും അധികൃതര്‍ സ്വീകരിക്കുന്നില്ല.
വരള്‍ച്ച കെടുതി അനുഭവിക്കുമ്പോള്‍ അതിര്‍ത്തി പ്രദേശങ്ങള്‍ സന്ദര്‍ശിച്ച് മന്ത്രിമാരും ജനപ്രതിനിധികളും പല വാഗ്ദാനങ്ങള്‍ നല്‍കുന്നതല്ലാതെ ഒരു പ്രവര്‍ത്തനവും നടത്താറില്ല. കന്നാരംപുഴ, മുദ്ദള്ളിതോട്, കടമാന്‍തോട് എന്നിവിടങ്ങളില്‍ പാഴായി ഒഴുകുന്ന ജലം തടഞ്ഞുനിര്‍ത്തി സംരക്ഷിക്കുന്നതിന് പദ്ധതികള്‍ ആരംഭിക്കാന്‍ ഇതുവരെ അധികൃതര്‍ക്ക് സാധിച്ചിട്ടില്ല. 2004ലെ കൊടും വരള്‍ച്ചയ്ക്ക് ശേഷം ഓരോ വര്‍ഷവും വരള്‍ച്ച പ്രതിരോധ പ്രവര്‍ത്തനങ്ങള്‍ക്ക് ഊന്നല്‍ നല്‍കുമെന്ന് പ്രഖ്യാപനം നടത്തുന്നതല്ലാതെ നാമമാത്രമായ തടയണകള്‍ നിര്‍മിച്ച് ജനപ്രതിനിധികള്‍ കുടിയേറ്റ മേഖലയിലെ കര്‍ഷകരെ അവഗണിക്കുന്ന സമീപനമാണ് സ്വീകരിക്കുന്നതെന്നാണ് കര്‍ഷകരുടെ പരാതി.