നിലമ്പൂര്‍: പോളിയോ വാക്‌സിന്‍ നല്‍കിയ ഒന്നര വയസുകാരന്റെ ഇരു കാലുകളും തളര്‍ന്നതായി പരാതി. നിലമ്പൂര്‍ ചന്തക്കുന്ന് ചാരംകുളം സ്വദേശിയുടെ മകനാണ് അധികൃതരുടെ അനാസ്ഥമൂലം തളര്‍ച്ച സംഭവിച്ചത്. കുട്ടി കോഴിക്കോട്ടെ സ്വകാര്യ ആശുപത്രിയില്‍ ചികിത്സയിലാണ്. കഴിഞ്ഞ ഏപ്രില്‍ ആറിനാണ് കുഞ്ഞിന് നിലമ്പൂര്‍ ചാരംകുളം ഹെല്‍ത്ത് സെന്ററില്‍ വച്ച് പോളിയോ വാക്‌സിന്‍ കൊടുത്തത്. ഒരാഴ്ച പിന്നിട്ടതോടെ കുഞ്ഞ് ഒരു കാല്‍ വലിച്ച് നടക്കാന്‍ തുടങ്ങി. പിന്നീട് മറ്റേകാലും വേച്ചുവേച്ചു നടക്കാന്‍ തുടങ്ങി. മെയ് പത്തോടെ കുഞ്ഞിന്റെ ഇരുകാലുകളും പൂര്‍ണമായും തളര്‍ന്നു. ആരോഗ്യ പ്രവര്‍ത്തകര്‍ നിര്‍ബന്ധിച്ചാണ് പോളിയോ വാക്‌സിന്‍ നല്‍കിയതെന്ന് ബന്ധുക്കള്‍ പറഞ്ഞു. വാക്‌സിന്‍ നല്‍കിയതിലെ അപാകതയാണ് കുഞ്ഞിന്റെ കാല്‍ തളരാനിടയാക്കിയതെന്നുംബന്ധുക്കള്‍ ആരോപിച്ചു. അതേസമയം പോളിയോ വാക്‌സിന്‍ നല്‍കിയതില്‍ അപാകത സംഭവിച്ചിട്ടില്ലെന്നാണ് ആരോഗ്യവകുപ്പ് അധികൃതര്‍ നല്‍കിയ വിശദീകരണം. ആരോഗ്യവകുപ്പിനെതിരേ നിയമ നടപടിക്കൊരുങ്ങുകയാണ് കുട്ടിയുടെ ബന്ധുക്കള്‍.