സെന്റ് ലൂസിയ: ഇംഗ്ലണ്ടിനെതിരായ അഞ്ചാം മത്സരത്തില്‍ വിന്‍ഡീസിന് ആധികാരിക വിജയം. ക്രിസ് ഗെയിലെന്ന ക്രിക്കറ്റ് മാന്ത്രികന്റെ ബാറ്റ് ഒരിക്കല്‍കൂടി ഇംഗ്ലീഷ് ബൗളര്‍മാരെ നിലംതൊടാതെ പറപ്പിച്ചപ്പൊള്‍ അഞ്ചു മത്സര ഏകദിന പരമ്പരയിലെ അവസാന മത്സരം ജയിച്ച് വിന്‍ഡീസ് ഇംഗ്ലണ്ടിനൊപ്പം 2-2ന് പരമ്പര പങ്കുവച്ചു.
ടോസ് ജയിച്ച വിന്‍ഡീസ് ക്യാപ്റ്റന്‍ ഹോള്‍ഡറിനു തെറ്റിയില്ല. കഴിഞ്ഞ മത്സരത്തില്‍ വിന്‍ഡീസ് ബൗളിങ് നിരയെ കശാപ്പു ചെയ്ത ഇംഗ്ലീഷ് ബാറ്റ്‌സ്മാന്‍മാര്‍ ഇത്തവണ സമ്പൂര്‍ണ പരാജയമായി. 23 റണ്‍സ് വീതമെടുത്ത അലക്‌സ് ഹെയ്ല്‍സിനും ജോസ് ബട്‌ലര്‍ക്കും പുറമെ മറ്റാരും പിടിച്ചു നില്‍ക്കാതെ വന്നപ്പോള്‍ ഇംഗ്ലണ്ട് 28.1 ഓവറില്‍ 113 റണ്‍സിന് പുറത്തായി. അഞ്ചു വിക്കറ്റ് നേടിയ ഒഷാനെ തോമസാണ് ഇംഗ്ലണ്ടിനെ എറിഞ്ഞിട്ടത്. ക്യാപ്റ്റന്‍ ജേസണ്‍ ഹോള്‍ഡറും ബ്രാത്‌വെയ്റ്റും രണ്ടു വിക്കറ്റ് വീതം നേടി ഒഷാനെയ്ക്ക് പിന്തുണ നല്‍കിയപ്പോള്‍ ഇംഗ്ലണ്ടിന്റെ തകര്‍ച്ച സമ്പൂര്‍ണമായി.

മറുപടി ബാറ്റിങ്ങില്‍ വിന്‍ഡീസിന് കാര്യങ്ങള്‍ അനായാസമായിരുന്നു. ടി20 ശൈലിയില്‍ ബാറ്റ് വീശിയ ക്രിസ് ഗെയ്‌ലിന്റെ മികവില്‍ മൂന്നു വിക്കറ്റ് നഷ്ടത്തില്‍ 12.1 ഓവറില്‍ വിജയലക്ഷ്യം മറികടന്നു.