റിയാദ്: ഡ്രൈവിങ്ങിനിടെ മൊബൈല്‍ ഉപയോഗിക്കുന്നതിനെ തുടര്‍ന്ന് സഊദിയില്‍ ആഴ്ചയില്‍ പത്ത് മരണങ്ങള്‍ സംഭവിക്കുന്നതായി റിപ്പോര്‍ട്ട്. നാഷനല്‍ റോഡ് സെക്യൂരിറ്റി സെന്റര്‍ പുറത്തിറക്കിയ കണക്ക് പ്രകാരം കഴിഞ്ഞ ഹിജ്‌റ വര്‍ഷം രാജ്യത്തുണ്ടായ വാഹനാപകടങ്ങളില്‍ 460 പേര്‍ക്ക് ജീവന്‍ നഷ്ടപ്പെട്ടതായും വ്യക്തമാക്കുന്നു. എന്നാല്‍, ഇതില്‍ ആഴ്ചയില്‍ ശരാശരി പത്ത് പേരുടെ മരണത്തിനിടയാക്കുന്നത് ഡ്രൈവിങ്ങിനിടെയുള്ള മൊബൈല്‍ ഫോണ്‍ ഉപയോഗമാണ്. കഴിഞ്ഞ വര്‍ഷം രാജ്യത്ത് ആകെ 1,61,702 വാഹനാപകടങ്ങളാണുണ്ടായത്.

പ്രതിദിനം ശരാശരി 456 വാഹനാപകടങ്ങള്‍ വീതമാണ് രാജ്യത്തുണ്ടായത്. മൊബൈല്‍ ഫോണ്‍ ഉപയോഗം മൂലമുള്ള വാഹനാപകടങ്ങള്‍ വര്‍ധിച്ചതിനെ തുടര്‍ന്ന് ഇതിനെതിരേ ശക്തമായ കാംപയിന്‍ ആരംഭിക്കാന്‍ അധികൃതര്‍ തീരുമാനിച്ചിട്ടുണ്ട്. ഇതിന്റെ ഭാഗമായി ഡ്രൈവിങ്ങിനിടെ മൊബൈല്‍ ഫോണ്‍ ഉപയോഗിക്കുന്നതിന്റെയും ഡ്രൈവിങ്ങില്‍ ശ്രദ്ധ കേന്ദ്രീകരിക്കാത്തതിന്റെയും അപകടങ്ങളെക്കുറിച്ച് ബോധവല്‍ക്കരിക്കുന്നതിനുള്ള ദേശീയ പ്രചാരണ കാംപയിന് ദേശീയ ഗതാഗത സുരക്ഷാ ബോധവല്‍ക്കരണ കമ്മിറ്റി ഇന്നലെ തുടക്കം കുറിച്ചു. ശഅ്ബാന്‍ മാസം അവസാനം വരെ കാംപയിന്‍ തുടരും.
നിലവില്‍ ഡ്രൈവിങ്ങിനിടെയുള്ള മൊബൈല്‍ ഫോണ്‍ ഉപയോഗത്തിന് ശക്തമായ പിഴയാണ് ട്രാഫിക് വിഭാഗം ഈടാക്കുന്നത്.