മഞ്ചേരി: മഞ്ചേരിയില്‍ പുതുതായി ആരംഭിച്ച പോളിടെക്‌നിക്ക് ഉള്‍പ്പെടെ പുതിയ കെട്ടിട നിര്‍മാണങ്ങള്‍ക്കും വിവിധ റോഡുകളുടേയും പാലങ്ങളുടേയും നവീകരണത്തിനും ബജറ്റില്‍ തുക വകയിരുത്തി. മഞ്ചേരി ഒലിപ്പുഴ റോഡ് നവീകരണത്തിനു പത്തുകോടിയാണു വകയിരുത്തിയത്. കൂടാതെ പോളിടെക്‌നിക്ക് കെട്ടിട നിര്‍മാണം, ബാബുരാജ് സംഗീത അകാദമി കെട്ടിട നിര്‍മാണം, മഞ്ചേരി ഫയര്‍‌സ്റ്റേഷന്‍ കെട്ടിടനിര്‍മാണം, അരിക്കണ്ടംപാക്ക് -നെമ്മിനി റോഡ് നവീകരണം, തൃക്കലങ്ങോട് വാട്ടര്‍ സപ്ലൈ സ്‌കീം, പാണ്ടിക്കാട് ഐ.ടി.സി കെട്ടിട നിര്‍മാണം എന്നിവയും ബജറ്റില്‍ പരാമര്‍ശിച്ചു.
ഐ.എസ്.ആര്‍.ഒ ശാസ്ത്രജ്ഞനായ ജിഷാദിനെ അനുമോദിച്ചു
കാളികാവ്: ഐ.എസ്.ആര്‍.ഒ ശാസ്ത്രജ്ഞനായി തെരെഞ്ഞെടുക്കപ്പെട്ട ജിഷാദിനെ മുസ്‌ലിംലീഗ് അഭിനന്ദിച്ചു. മലപ്പുറം ജില്ലയിലെ ചോക്കാട് കല്ലാമൂല മണ്ടായി ഹംസയുടെ മകന്‍ ജിഷാദാണു തന്റെ പരിശ്രമങ്ങളിലൂടെ ഐ.എസ്.ആര്‍.ഒ ശാസ്ത്രജ്ഞനായി തെരെഞ്ഞെടുക്കപ്പെട്ടത്.
അഹമ്മദാബാദിലെ സ്‌പേസ് അപ്ലിക്കേഷന്‍ സെന്ററിലെ ശാസ്ത്രജ്ഞനായിട്ടാണു നിയമിക്കപ്പെട്ടിട്ടുള്ളത്.
കല്ലാമൂല ഗവ: എല്‍.പി.സ്‌കൂളിലും പുല്ലങ്കോട് ഗവണ്‍മെന്റ് ഹയര്‍ സെക്കണ്ടറി സ്‌കൂളിലും പഠനം നടത്തി ചുങ്കത്തറ മാര്‍ത്തോമ കോളേജില്‍ നിന്ന് ബി.എസ്.സി. ഫിസിക്‌സില്‍ ബിരുദം നേടിയ ജിഷാദ് കുസാറ്റ് എന്‍ട്രന്‍സ് പരീക്ഷ എഴുതി നേടുകയും കുസാറ്റില്‍ നിന്ന് എം.എസ്.സി. ഓഷ്യനോഗ്രാഫിക്കു ചേരുകയും അവിടെ ഗവേഷണം ചെയ്യുന്നതിനിടെയാണ് ഐ.എസ്.ആര്‍.ഒയില്‍ അവസരം ലഭിക്കുന്നത്.
ലീഗ് പഞ്ചായത്ത് കമ്മിറ്റിയുടെ നേതൃത്വത്തിലൊരുക്കിയ അനുമോദന ചടങ്ങ് കാളികാവ് ബ്ലോക്ക് പഞ്ചായത്ത് പ്രസിഡന്റ് പി. ഖാലിദ് ഉദ്ഘാടനം ചെയ്തു. യൂത്ത് ലീഗ് പഞ്ചായത്ത് പ്രസിഡന്റ് അനീസ് കൂരാട് അധ്യക്ഷത വഹിച്ചു. ഭാരവാഹികളായ ടി.എ സമീര്‍, മുഹമ്മദ് കുട്ടി മാസ്റ്റര്‍, നസ്‌റുല്ല പുല്ലങ്കോട്, ഹബീബ് ചോക്കാട്, ജിഷാദ് തുടങ്ങിയവര്‍ പ്രസംഗിച്ചു.