കല്ലമ്പലം: കഴിഞ്ഞ ദിവസം മഴയോടൊപ്പം വീശിയടിച്ച കാറ്റില്‍ റോഡിനു സമീപം നിന്ന റബര്‍ മരം വീണ് വൈദ്യുതിയും ഗതാഗതവും തടസപ്പെട്ടു.
നാവായിക്കുളം ഡീസന്റ്മുക്ക് കോളനിമുക്ക് കോട്ടറ ക്കോണം റോഡില്‍ കോട്ടറക്കോണത്തിനു സമീപമാണ് കഴിഞ്ഞ ദിവസം മരം റോഡിനു കുറുകെ വീണത്. മരങ്ങള്‍ ഒടിഞ്ഞു വീഴുന്നതിന്റെ ശബ്ദവും വൈദ്യുതി ലൈനുകള്‍ കൂട്ടിമുട്ടിയുള്ള തീയും പുകയും സമീപത്തുള്ള വീട്ടുകാരെ പരിഭ്രാന്തരാക്കി. ഇവര്‍ കെ.എസ്.ഇ.ബിയില്‍ അറിയിച്ചതിനെത്തുടര്‍ന്ന് വൈദ്യുതി ഓഫായാക്കിയ ശേഷം സ്ഥലത്തെത്തിയ ജീവനക്കാര്‍ വൈകാതെ വൈദ്യുതി പുനഃസ്ഥാപിച്ചെങ്കിലും ഏറേ വൈകിയാണ് മരങ്ങള്‍ മുറിച്ചു മാറ്റി ഗതാഗതം പുനഃസ്ഥാപിച്ചത്. അതുവരെ സ്‌കൂള്‍ ബസുകള്‍ അടക്കം നിരവധി വാഹനങ്ങള്‍ വഴി തിരിച്ചു വിട്ടു.