മാവൂര്‍: ചെറൂപ്പ ആശുപത്രിയിലെ എച്ച്.ഐക്ക് സ്ഥലംമാറ്റം. പഞ്ചായത്തിന്റെ ആരോഗ്യപ്രവര്‍ത്തനങ്ങളില്‍ അദ്ദേഹം സഹകരിക്കുന്നില്ലെന്നും പഞ്ചായത്ത് പ്രസിഡന്റ്, വാര്‍ഡ് മെംബര്‍മാര്‍ എന്നിവരോട് നിരന്തരം മോശമായി പെരുമാറുന്നുവെന്നും ആരോപിച്ച് പഞ്ചായത്ത് യു.ഡി.എഫ് അംഗങ്ങള്‍ കഴിഞ്ഞ ഏപ്രില്‍ 13ന് ആശുപത്രിയുടെ കാര്യാലയത്തിനു മുന്നില്‍ കുത്തിയിരുപ്പ് സമരം നടത്തിയിരുന്നു. ഹെല്‍ത്ത് ഇന്‍സ്‌പെക്ടര്‍ പി. ഉണ്ണികൃഷ്ണന്‍ മാവൂര്‍ പഞ്ചായത്തിലെ ഗരിമ പദ്ധതിയ്ക്കടക്കം നിസഹകരിക്കുന്നുവെന്നാരോപിച്ചായിരുന്നു സമരം.
എച്ച്.ഐക്കെതിരേ നടപടി വേണമെന്നാവശ്യപ്പെട്ടാണ് പഞ്ചായത്ത് പ്രസിഡന്റ്, വൈസ് പ്രസിഡന്റ് എന്നിവരുടെ നേതൃത്വത്തിലുള്ള യു.ഡി.എഫ് അംഗങ്ങള്‍ സമരം നടത്തിയിരുന്നത്. ഇതേതുടര്‍ന്ന് സ്ഥലത്തെത്തിയ എ.ഡി.എം.ഒ ഡോ. ആശാദേവി, ആശുപത്രി ഇന്‍ ചാര്‍ജ് ഡോ. ബിന്ദു എന്നിവര്‍ യു.ഡി.എഫ് നേതാക്കളും ജനപ്രതിനിധികളുമായി ചര്‍ച്ച നടത്തുകയും എച്ച്.ഐയ്‌ക്കെതിരേ ഒരാഴ്ചക്കകം നടപടിയെടുക്കാന്‍ ശുപാര്‍ശ ചെയ്യാമെന്ന വ്യവസ്ഥയില്‍ സമരം അവസാനിപ്പിക്കുകയായിരുന്നു. അതേസമയം തനിക്ക് സ്ഥലംമാറ്റം സംബന്ധിച്ച് യാതൊരു അറിയിപ്പും ലഭിച്ചിട്ടില്ലെന്ന് അദ്ദേഹം പറഞ്ഞു.