നിലമ്പൂര്‍: ഡി.ജി.പി. ഓഫിസിനു മുന്നില്‍ ജിഷ്ണു പ്രണോയിയുടെ മാതാവ് മഹിജക്ക് അടക്കം മര്‍ദനമേറ്റ സംഭവത്തില്‍ പാര്‍ട്ടി സെക്രട്ടറിയുടെ തീരുമാനമാണ് തനിക്കെന്നും വനം മന്ത്രി അഡ്വ. കെ. രാജു.  ആനക്കുട്ടിയെ സന്ദര്‍ശിക്കാന്‍ എത്തിയ മന്ത്രി മാധ്യമ പ്രവര്‍ത്തകരുടെ ചോദ്യത്തിന് മറുപടി നല്‍കുകയായിരുന്നു. പൊലിസിന്റെ ഭാഗത്ത് നിന്നും കാര്യമായ വീഴ്ചയുണ്ടായില്ലെന്ന് കരുതുമ്പോഴും ഡി.ജി.പി ഒന്ന് സംസാരിച്ചിരുന്നെങ്കില്‍ പ്രശ്‌നം ഒഴിവാക്കാമായിരുന്നു. ജിഷ്ണു പ്രണോയിയുടെ കുടുംബത്തോട് കുറച്ചുകൂടി മനുഷ്യത്വപരമായി ഇടപെടാമായിരുന്നുവെന്നും ഡി.ജി.പിക്ക് ജിഷ്ണുവിന്റെ കുടുംബത്തെ അങ്ങോട്ട് ചെന്ന് കാണാമായിരുന്നതില്‍ ഒരു കുഴപ്പവും ഉണ്ടാവില്ലായിരുന്നുവെന്നും അദ്ദേഹം പറഞ്ഞു.
പൊലിസ് മര്‍ദനവുമായി ബന്ധപ്പെട്ടു പത്ര പരസ്യങ്ങള്‍ പുറത്തിറക്കിയത് ശ്രദ്ധയില്‍പ്പെട്ടില്ലെന്നും അദ്ദേഹം പറഞ്ഞു. അതിരപ്പള്ളി വിഷയത്തില്‍ വനം വകുപ്പിന്റെ അനുമതി ഇല്ലാതെ വനത്തിനുള്ളില്‍ ഒരു പ്രവൃത്തിയും നടത്തില്ല. സി.പി.ഐയുടെ നിലപാട് എപ്പോഴും പാര്‍ട്ടി സെക്രട്ടറി എടുക്കുന്ന തീരുമാനങ്ങള്‍ക്ക് തുല്യമായിരിക്കും. കോടൂരില്‍ ആന സംരക്ഷണ കേന്ദ്രം നിര്‍മിക്കുന്ന കാര്യം പരിഗണനയിലാണ്. വനഭൂമി വിട്ടുകൊടുത്ത് അതിരപ്പള്ളിയില്‍ വൈദ്യുത പദ്ധതി നടപ്പാക്കില്ല. മലപ്പുറത്തെ വിജയ പരാജയം സംസ്ഥാന സര്‍ക്കാറിന്റെ വിലയിരുത്തലാവില്ലെന്നും മന്ത്രി പറഞ്ഞു.