തേഞ്ഞിപ്പലം: കാലിക്കറ്റ് സര്‍വകലാശാല സ്റ്റേഡിയത്തില്‍ നാല് ദിവസങ്ങളിലായി നടന്ന അഖിലേന്ത്യാ അന്തര്‍ സര്‍വകലാശാല വനിതാ സോഫ്റ്റ് ബോള്‍ ചാംപ്യന്‍ഷിപ്പില്‍ 9 പോയിന്റോടെ കാലിക്കറ്റ് സര്‍വകലാശാല ജേതാക്കളായി. ചാംപ്യന്‍ഷിപ്പിലെ അവസാന മത്സരത്തില്‍ മംഗളൂരു സര്‍വകലാശാലയെ പരാജയപ്പെടുത്തിയാണ് കാലിക്കറ്റ് ഒന്നാമതെത്തിയത്. കഴിഞ്ഞ വര്‍ഷത്തെ ജേതാക്കളായ അമൃത്‌സര്‍ ഗുരുനാനാക്ക് ദേവ് സര്‍വകലാശാലയെ (ജി.എന്‍.ഡി.യു) പരാജയപ്പെടുത്തി ഗ്രൂപ്പ് ചാംപ്യന്‍മാരായാണ് കാലിക്കറ്റ് ലീഗിലെ അവസാന മത്സരത്തിലേക്ക് പ്രവേശിച്ചത്. ആറു പോയിന്റുമായി എം.ജി യൂനിവേഴ്‌സിറ്റി രണ്ടാം സ്ഥാനവും മൂന്ന് പോയിന്റോടെ ദേവി അഹല്യ ഇന്റോര്‍ മൂന്നാം സ്ഥാനവും കരസ്ഥമാക്കി. ചാംപ്യന്‍ഷിപ്പില്‍ 48 സര്‍വകലാശാലകളാണ് പങ്കെടുത്തത്. സമാപന ചടങ്ങില്‍ വിജയികള്‍ക്കുള്ള ട്രോഫിയും മെഡലുകളും കാലിക്കറ്റ് സര്‍വകലാശാല വൈസ് ചാന്‍സലര്‍ ഡോ. മുഹമ്മദ് ബഷീര്‍ സമ്മാനിച്ചു.