മുംബൈ: അവസാനം വരെ ആവേശം നിലനിന്ന പോരാട്ടത്തില്‍ കൊല്‍ക്കത്ത നൈറ്റ്‌റൈഡേഴ്‌സിനെ വീഴ്ത്തി മുംബൈ ഇന്ത്യന്‍സ് നാലു വിക്കറ്റിന്റെ വിജയം സ്വന്തമാക്കി. ആദ്യം ബാറ്റു ചെയ്ത കൊല്‍ക്കത്ത 20 ഓവറില്‍ 178 റണ്‍സെടുത്തപ്പോള്‍ മുംബൈ 19.5 ഓവറില്‍ ആറു വിക്കറ്റ് നഷ്ടത്തില്‍ 180 റണ്‍സെടുത്തു വിജയിച്ചു.
മുംബൈയ്ക്കായി നിതീഷ് റാണ (50), പാര്‍ഥിവ് പട്ടേല്‍ (30), ജോസ് ബട്‌ലര്‍ (28) എന്നിവര്‍ തിളങ്ങി. 11 പന്തില്‍ 29 റണ്‍സ് അടിച്ചെടുത്ത ഹര്‍ദിക് പാണ്ഡ്യയുടെ മിന്നലടികള്‍ വിജയത്തില്‍ നിര്‍ണായകമായി. കൊല്‍ക്കത്തക്കായി രജപൂത് മൂന്നു വിക്കറ്റുകള്‍ വീഴ്ത്തി.
ടോസ് നേടി മുംബൈ എതിരാളികളെ ബാറ്റിങിനു വിടുകയായിരുന്നു. നിശ്ചിത 20 ഓവറില്‍ കൊല്‍ക്കത്തയുടെ പോരാട്ടം ഏഴു വിക്കറ്റ് നഷ്ടത്തില്‍ 178 റണ്‍സില്‍ അവസാനിച്ചു. ബാറ്റിങ് തുടങ്ങിയ കൊല്‍ക്കത്തയുടെ തുടക്കം മികച്ചതായിരുന്നു. ഗംഭീറും ലിന്നും ചേര്‍ന്ന സഖ്യം 44 റണ്‍സ് കൂട്ടിച്ചേര്‍ത്തു. ഗംഭീര്‍ 19ഉം ക്രിസ് ലിന്‍ 32ഉം റണ്‍സെടുത്തു.
പിന്നീടു മനീഷ് പാണ്ഡെ നടത്തിയ ഒറ്റയാള്‍ പ്രകടനമാണു കൊല്‍ക്കത്തയ്ക്ക് പൊരുതാവുന്ന സ്‌കോര്‍ സമ്മാനിച്ചത്. മനീഷ് 47 പന്തില്‍ അഞ്ചു വീതം ഫോറും സിക്‌സും പറത്തി 81 റണ്‍സെടുത്തു പുറത്താകാതെ നിന്നു. ക്രുനല്‍ പാണ്ഡ്യ നാലോവറില്‍ 24 റണ്‍സ് വഴങ്ങി മൂന്നു വിക്കറ്റുകള്‍ വീഴ്ത്തി.