കോഴിക്കോട്: 'മിന്നാമിനുങ്ങ്' എന്ന സിനിമയിലെ കേന്ദ്ര കഥാപാത്രത്തെ അവതരിപ്പിച്ച് മികച്ച നടിക്കുള്ള ദേശീയ പുരസ്‌കാരം നേടിയ നടി സുരഭി ലക്ഷ്മിയെ എം.കെ രാഘവന്‍ എം.പി നടിയുടെ നരിക്കുനിയിലെ വസതിയില്‍ സന്ദര്‍ശിച്ച് ആശംസകള്‍ അറിയിച്ചു. 2013 ല്‍ 'പാഠം ഒന്ന് ഒരു വിലാപം'എന്ന സിനിമയിലെ അഭിനയത്തിലൂടെ മികച്ച നടിക്കുള്ള അവാര്‍ഡ് നേടിയ മീരാജാസ്മിന് ശേഷം മികച്ച നടിയായ് തിരഞ്ഞെടുക്കപ്പെട്ട സുരഭിയിലൂടെ മലയാള സിനിമയുടെ യശസ് ഉയര്‍ന്നതോടോപ്പം, കോഴിക്കോടിന്റെ കലാ മേഖലയ്ക്ക് അഭിമാനിക്കാവുന്ന നിമിഷങ്ങളാണെന്നും നടിയെ സന്ദര്‍ശിച്ച ശേഷം എം.പി സൂചിപ്പിച്ചു. നരിക്കുനി പഞ്ചായത്തംഗങ്ങളായ ഫസല്‍, പി.ഐ വസുദേവന്‍ നമ്പൂതിരി, നരിക്കുനി മണ്ഡലം യൂത്ത് കോണ്‍ഗ്രസ് പ്രസിഡന്റ് സജിത് എന്നിവരും കൂടെയുണ്ടായിരുന്നു.