ആലപ്പുഴ: കേരളത്തിലെ വിവിധ ജില്ലകളിലായി രണ്ടായിരത്തിലധികം ചില്ലറ വില്‍പ്പന കേന്ദ്രങ്ങള്‍ തുടങ്ങുന്നത് വിഭാവനം ചെയ്ത് കയര്‍ കോര്‍പ്പറേഷന്റെ 2019-20 വര്‍ഷത്തേക്കുള്ള പ്രവര്‍ത്തന പദ്ധതികളും, വിറ്റുവരവ് 300 കോടി രൂപയാക്കുന്നതിനുള്ള ബജറ്റും ഡയറക്ടര്‍ ബോര്‍ഡ് അംഗീകരിച്ചു. കഴിഞ്ഞ 10 വര്‍ഷമായി ലാഭത്തില്‍ പ്രവര്‍ത്തിക്കുന്ന കേരള സ്റ്റേറ്റ് കയര്‍ കോര്‍പ്പറേഷന്‍, പുതുവര്‍ഷത്തില്‍ വിറ്റുവരവിലും ലാഭത്തിലും പുതിയ ഉയരങ്ങള്‍ കീഴടക്കുന്നതിനുള്ള ശ്രമത്തിലാണ്. തനത് സാമ്പത്തിക വര്‍ഷം ഇതുവരെ 160 കോടി രൂപ വിറ്റുവരവ് നേടിയ കമ്പനി വര്‍ഷാവസാനത്തോടെ വിറ്റുവരവ് 170 കോടിയില്‍ എത്തിക്കുവാനുള്ള തീവ്രശ്രമത്തിലാണ്.
കമ്പനിയുടെ അടൂര്‍ ഡിവിഷനില്‍ വര്‍ദ്ധിച്ച ഉല്‍പ്പാദനക്ഷമതയുള്ള നാല് ടഫ്റ്റിങ് ലൈനുകള്‍ സ്ഥാപിക്കുക, ടഫ്റ്റഡ് ഡോര്‍മാറ്റുകളുടെ മൂല്യ വര്‍ധനയ്ക്കായി അടൂര്‍ ഡിവിഷനില്‍ സ്റ്റെന്‍സിലിങ് യൂനിറ്റ് സ്ഥാപിക്കുക,കമ്പനിയുടെ ബേപ്പൂര്‍ ഡിവിഷനില്‍ മെത്ത നിര്‍മാണ യൂനിറ്റ് സ്ഥാപിക്കുക, അധിക ഉല്‍പ്പാദനക്ഷമതയുള്ള ഓട്ടോമാറ്റിക്ക് തറികള്‍ സ്ഥാപിച്ച് കയര്‍ ഭൂവസ്ത്രം നിര്‍മിക്കുക, കേരളത്തിലെ എല്ലാ ജില്ലകളിലുമായി രണ്ടായിരത്തിലധികം ചില്ലറ വില്‍പ്പന കേന്ദ്രങ്ങളിലൂടെ കയര്‍ ഉല്‍പ്പന്നങ്ങള്‍ വിറ്റഴിക്കുക തുടങ്ങിയവയാണ് പദ്ധതികളില്‍ പ്രധാനപ്പെട്ടവ. കൂടാതെ, ചകിരി ലഭ്യതയില്‍ സ്വയംപര്യാപ്തത നേടുന്നതിന് വേണ്ടി ലക്ഷദ്വീപില്‍ ചകിരി മില്ലുകള്‍ സ്ഥാപിക്കുന്ന പ്രവര്‍ത്തനം പുരോഗമിച്ചുവരുന്നു.