നിലമ്പൂര്‍: ഒന്നര കിലോ കഞ്ചാവുമായി കഞ്ചാവ് മൊത്തവിതരണക്കാരന്‍ നിലമ്പൂര്‍ എക്‌സൈസിന്റെ പിടിയിലായി. മലപ്പുറം മേല്‍മുറി കിഴക്കേത്തല പട്ടര്‍കടവന്‍ വീട്ടില്‍ പി.കെ നയീമി (43) നെയാണ് റെയ്ഞ്ച് ഇന്‍സ്‌പെക്ടര്‍ കെ.ടി സജിമോനും സംഘവും അറസ്റ്റ് ചെയ്തത്.
പൊലിസും എക്‌സൈസും കഞ്ചാവ് കേസില്‍ പിടിച്ചു വിചാരണ നേരിടുന്ന പ്രതിയെയാണ് വീണ്ടും എക്‌സൈസ് സംഘം അറസ്റ്റ് ചെയ്തത്. തമിഴ്‌നാട്ടിലെ കമ്പം, തേനി ഭാഗങ്ങളില്‍നിന്നു കഞ്ചാവ് മൊത്തമായെടുത്തു ജില്ലയുടെ വിവിധ ഭാഗങ്ങളില്‍ വിതരണം ചെയ്യുന്ന ശൃംഖലയിലെ മുഖ്യ കണ്ണിയാണിയാളെന്ന് എക്‌സൈസ് ഉദ്യോഗസ്ഥര്‍ അറിയിച്ചു.
ഇന്റലിജന്‍സ് ഇന്‍സ്‌പെക്ടര്‍ ജിനീഷ്, പ്രിവന്റീവ് ഓഫിസര്‍മാരായ ബിജു പി. എബ്രഹാം, ഷിജുമോന്‍, സിവില്‍ എക്‌സൈസ് ഓഫിസര്‍മാരായ അഭിലാഷ്, പ്രദീപ് കുമാര്‍, ഏഞ്ചലിന്‍ ചാക്കോ എന്നിവരും റെയ്ഡ് സംഘത്തിലുണ്ടായിരുന്നു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.