ചെന്നൈ: തമിഴ് സൂപ്പര്‍സ്റ്റാര്‍ ഇളയദളപതി വിജയും ഹിറ്റ് മേക്കര്‍ സംവിധായകന്‍ എ.ആര്‍.മുരുഗദാസും ഒരുമിക്കുന്നചിത്രമായ സര്‍ക്കാരിന്റെ ഫസ്റ്റ്‌ലുക്ക് പോസ്റ്ററിനെ വിമര്‍ശിച്ച് മുന്‍ കേന്ദ്രമന്ത്രിയും പി.എം.കെ.നേതാവുമായ അന്‍പുമണി രാമദാസ് രംഗത്ത്. 

പോസ്റ്ററില്‍ പുകവലിയെ പ്രോത്സാഹിപ്പിക്കുന്ന വിജയ്‌യെ ഓര്‍ത്ത് നാണക്കേട് തോന്നുന്നുവെന്നാണ് അന്‍പുമണി പറഞ്ഞത്. ചിത്രത്തിന്റെ ഫസ്റ്റ്‌ലുക്ക് പോസ്റ്ററില്‍ പുകയുന്ന സിഗരറ്റും കത്തുന്ന ലൈറ്റുമായാണ് വിജയ് പ്രത്യക്ഷപ്പെടുന്നത്. ഉത്തരവാദിത്തത്തോടെ പ്രവര്‍ത്തിക്കൂ, പുകവലി പ്രോത്സാഹിപ്പിക്കാതിരിക്കൂ എന്ന ഹാഷ്ടാഗോടെയായിരുന്നു അന്‍പുമണിയുടെ പ്രതികരണം.
പുകവലിക്കുന്ന രംഗങ്ങള്‍ ഇനി തന്റെ സിനിമയില്‍ ഉണ്ടാവില്ലെന്ന് വിജയ് പ്രഖ്യാപിച്ച പത്ര റിപ്പോര്‍ട്ടും അന്‍പുമണി ട്വീറ്റ് ചെയ്തിട്ടുണ്ട്.