മലപ്പുറം: മുസ്ലിം ലീഗ് സംസ്ഥാന പ്രസിഡന്റ് പാണക്കാട് സയ്യിദ് ഹൈദരലി ശിഹാബ് തങ്ങളെ അപകീര്‍ത്തിപ്പെടുത്തി പോസ്റ്റിട്ട യുവാവിനെ പൊലിസ് അറസ്റ്റ് ചെയ്തു. റംസാന്‍ റിലീഫ് കിറ്റില്‍ ഹൈദരലി ശിഹാബ് തങ്ങളുടെ ഫോട്ടോ മോര്‍ഫ്ചെയ്ത് ഫേസ്ബുക്കില്‍ പ്രചരിപ്പിച്ച താനൂര്‍ പനങ്ങാട്ടൂര്‍ അട്ടത്തോട് ചാഞ്ചേരിപറമ്പിലെ കറങ്കാണി പറമ്പില്‍ രാഗേഷ് എന്ന ഉണ്ണിക്കുട്ടനെയാണ് താനൂര്‍ എസ്.ഐ നവീന്‍ഷാജ് അറസ്റ്റ് ചെയ്തത്. ഐപിസി 153, കേരള പോലീസ് ആക്റ്റ് 120(0) എന്നീ വകുപ്പുകളാണ് പ്രതിക്കെതിരെ ചുമത്തിയിരിക്കുന്നത്.

റംസാന്‍ റിലീഫ് കിറ്റില്‍ ഹൈദരലി ശിഹാബ് തങ്ങളുടെ ഫോട്ടോ മോര്‍ഫ്ചെയ്ത് ഹാന്‍സിന്റെ പായ്ക്കറ്റ് സഹിതമുള്ള കിറ്റാക്കി ചിത്രീകരിക്കുകയായിരുന്നു. യുവാവ് ഫേസ്ബുക്കില്‍ പോസ്റ്റ് ചെയ്ത ചിത്രം ഷെയര്‍ ചെയ്ത മുഴുവന്‍ ആളുകള്‍ക്കെതിരെയും കേസെടുക്കുമെന്ന് താനൂര്‍ സി.ഐ പി പ്രമോദ് പറഞ്ഞു. തിരൂരങ്ങാടി മണ്ഡലം യൂത്ത് ലീഗ് ജനറല്‍ സെക്രട്ടറി യു.എ റസാഖ് നല്‍കിയ പരാതിയില്‍ അഖില്‍ കൃഷ്ണക്കെതിരെ കേസ് രജിസ്റ്റര്‍ ചെയ്ത് അന്വേഷണം ആരംഭിച്ചതായും സി.ഐ പറഞ്ഞു.