കൊച്ചി: സംസ്ഥാന മനുഷ്യാവകാശ കമ്മിഷന്‍ അധ്യക്ഷന്‍ ജസ്റ്റിസ് ജെ.ബി കോശി നാളെ രാവിലെ 10 ന് കളമശേരി മെഡിക്കല്‍ കോളജ് ക്യാംപസിലുള്ള കൊച്ചി കാന്‍സര്‍ സെന്ററിന് അനുവദിച്ചിരിക്കുന്ന സ്ഥലം സന്ദര്‍ശിക്കും.
മേയ് 27ന് കൊച്ചിയില്‍ നടന്ന സിറ്റിങില്‍ കേസ് പരിഗണിക്കുമ്പോള്‍ സര്‍ക്കാരിനും കാന്‍സര്‍ സെന്ററിനും വേണ്ടി ആരും ഹാജരായിരുന്നില്ല. തുടര്‍ന്നാണ് സ്ഥലം സന്ദര്‍ശിക്കാന്‍ കമ്മിഷന്‍ തീരുമാനിച്ചത്.
സിറ്റിങില്‍ കാന്‍സര്‍ സെന്റര്‍ സ്‌പെഷ്യല്‍ ഓഫീസര്‍ ഹാജരാകാത്തതിനെ കമ്മിഷന്‍ രൂക്ഷമായി വിമര്‍ശിച്ചിരുന്നു. എന്തിനു വേണ്ടിയാണ് സ്‌പെഷ്യല്‍ ഓഫീസറെ നിയമിച്ചതെന്നും ജസ്റ്റിസ് ജെ.ബി കോശി ചോദിച്ചു. ഇതില്‍ കമ്മിഷന്‍ അതൃപ്തി രേഖപ്പെടുത്തുകയും ചെയ്തു.
കൊച്ചിയിലെ സ്വകാര്യ ആശുപത്രികളുടെയും തിരുവനന്തപുരത്തെ ഉദ്യോഗസ്ഥരുടെയും സ്വാധീനത്തിന് വഴങ്ങിയാണ് നടപടിയെടുക്കാത്തതെന്നും കമ്മിഷന്‍ വിമര്‍ശിച്ചിരുന്നു. സ്ഥലം സന്ദര്‍ശിച്ചതിനു ശേഷം കാക്കനാട് കലക്ടറേറ്റ് കോണ്‍ഫറന്‍സ് ഹാളില്‍ നടക്കുന്ന സിറ്റിങില്‍ ജസ്റ്റിസ് ജെ.ബി കോശി കേസ് പരിഗണിക്കും.
കമ്മിഷന്‍ സ്ഥലം സന്ദര്‍ശിക്കുമ്പോള്‍ കാന്‍സര്‍ സെന്റര്‍ സ്‌പെഷ്യല്‍ ഓഫീസറും എറണാകുളം മെഡിക്കല്‍ കോളജ് പ്രിന്‍സിപ്പലും ഹാജരാകണമെന്ന് ഉത്തരവില്‍ പറയുന്നു.
തമ്പി സുബ്രഹ്മണ്യന്‍, പ്രൊഫ.എം.കെ സാനു, മുന്‍ എം.പി പി രാജീവ്, കെ.ആര്‍ വിശ്വംഭരന്‍, ഡോ.എന്‍.കെ സനില്‍കുമാര്‍, ജസ്റ്റിസ് പി ഷംസുദ്ദീന്‍, പി രാമചന്ദ്രന്‍, സി.ജി രാജഗോപാല്‍, അഡ്വ.ടി.ബി മിനി തുടങ്ങിയവര്‍ സമര്‍പ്പിച്ച പരാതിയിലാണ് നടപടി.