കുറവിലങ്ങാട്: നിയന്ത്രണം വിട്ട കാര്‍ ലോറിയിലിടിച്ച് ഒരാള്‍ മരിച്ചു. യാത്രക്കാരായ അഞ്ചുപേര്‍ക്ക് അപകടത്തില്‍ പരുക്കേറ്റു. കോന്നി വാകയാര്‍ ഈട്ടിനില്‍ക്കുന്നതില്‍ അലക്‌സാ(33)ണ് മരിച്ചത്. അലക്‌സിന്റെ പിതാവ് കുഞ്ഞൂഞ്ഞ് (60), സഹോദരി അനിത, മക്കളായ ആന്റോ(മൂന്ന്), ആന്‍സു( ആറ്), ആന്‍സണ്‍ (11) എന്നിവരെ പരുക്കുകളോടെ കോട്ടയം മെഡിക്കല്‍ കോളജ് ആശുപത്രിയിലും കുട്ടികളുടെ ആശുപത്രിയിലുമായി പ്രവേശിപ്പിച്ചു. 

ഇന്നുപുലര്‍ച്ചെ അഞ്ചേകാലോടെ എം.സി റോഡില്‍ കുറവിലങ്ങാട് പൊലിസ് സ്റ്റേഷന് സമീപമായിരുന്നു അപകടം. കോട്ടയം ഭാഗത്തേക്ക് പോകുകയായിരുന്ന കാര്‍ എതിര്‍ദിശയിലെത്തിയ ലോറിയിലിടിക്കുകയായിരുന്നു.

കാര്‍ വലതുവശത്തുകൂടി പോകുകയായിരുന്ന ലോറിയില്‍ ഇടിക്കുകയായിരുന്നു. ലോറി വെട്ടിച്ച് മാറ്റാന്‍ ശ്രമം നടത്തിയെങ്കിലും വിജയിച്ചില്ല. ഇടിയുടെ ആഘാതത്തില്‍ കാറിന്റെ മുന്‍ഭാഗം ലോറിക്കടിയിലേക്ക് കയറിപ്പോയ സ്ഥിതിയിലായിരുന്നു. വിവരമറിഞ്ഞെത്തിയ നാട്ടുകാരും ഫയര്‍ഫോഴ്‌സും ചേര്‍ന്നാണ് രക്ഷാപ്രവര്‍ത്തനം നടത്തിയത്.

ടൗണിലെ ഓട്ടോറിക്ഷാഡ്രൈവര്‍മാരുടെ കൂട്ടായ പരിശ്രമം രക്ഷാപ്രവര്‍ത്തനരംഗത്ത് ശ്രദ്ധേയമായിരുന്നു. എസ്.ഐ കെ.എസ് ജയന്റെ നേതൃത്വത്തിലുള്ള പൊലിസ് സംഘവും ഹൈവേ പൊലിസും പ്രവര്‍ത്തനങ്ങള്‍ക്ക് നേതൃത്വം നല്‍കി.