തിരുവനന്തപുരം: ചെയ്ത ജോലിയുടെ വേതനം ലഭിക്കുക എന്നത് ഏതൊരാളുടെയും അവകാശമാണെന്നും അത് നല്‍കാതിരിക്കുന്നത് നീതി നിഷേധവും മനുഷ്യാവകാശ ലംഘനവുമാണെന്നും സംസ്ഥാന മനുഷ്യാവകാശ കമ്മിഷന്‍ അധ്യക്ഷന്‍ ജസ്റ്റിസ് ആന്റണി ഡൊമിനിക്.

ശാസ്ത്ര സാങ്കേതിക പരിസ്ഥിതി കൗണ്‍സിലില്‍ മീഡിയ കണ്‍സള്‍ട്ടന്റായി പ്രവര്‍ത്തിച്ചിരുന്ന രോഗബാധിതനായ മുതിര്‍ന്നപൗരന് വര്‍ധിപ്പിച്ച ആനുകൂല്യവും കുടിശ്ശികയും എത്രയും വേഗം നല്‍കണമെന്ന് കമ്മിഷന്‍ ആവശ്യപ്പെട്ടു.കവടിയാര്‍ പണ്ഡിറ്റ്‌സ് കോളനിയില്‍ താമസിക്കുന്ന എ. പ്രഭാകരന് വേതനം നല്‍കാനാണ് ഉത്തരവ്. 2012 ലാണ് പരാതിക്കാരന്‍ കൗണ്‍സിലില്‍ ചേര്‍ന്നത്. പ്രതിമാസം 20,000 രൂപയായിരുന്നു ശമ്പളം. 2014ല്‍ 35,000 രൂപയായി കൗണ്‍സില്‍ യോഗം വര്‍ധിപ്പിച്ചു.

എന്നാല്‍ വര്‍ധിപ്പിച്ച ഹോണറേറിയം നല്‍കിയില്ല. വര്‍ധിപ്പിച്ച വേതനത്തിന് കൗണ്‍സില്‍ ഉത്തരവിറക്കിയില്ലെന്നാണ് മെംബര്‍ സെക്രട്ടറി കമ്മിഷനില്‍ സമര്‍പ്പിച്ച വിശദീകരണത്തില്‍ പറയുന്നത്. അക്കൗണ്ടന്റ് ജനറലും ധനകാര്യപരിശോധനാ വിഭാഗവും നിയമനത്തില്‍ തടസവാദം ഉന്നയിച്ചത് കാരണമാണ് ഉത്തരവ് ഇറക്കാത്തത്. 2015ല്‍ വിജിലന്‍സ് നടത്തിയ മിന്നല്‍ പരിശോധനയില്‍ മറ്റ് ഫയലുകള്‍ക്കൊപ്പം പരാതിക്കാരന്റെ നിയമന ഫയലും കണ്ടുകെട്ടി. കൗണ്‍സിലിലെ സ്ഥിരം ജീവനക്കാര്‍ക്ക് ഉള്‍പ്പെടെ ഇക്കാരണത്താല്‍ ആനുകൂല്യം നല്‍കാന്‍ കഴിഞ്ഞിട്ടില്ല.

വിജിലന്‍സിന്റെ പേര് പറഞ്ഞ് വേതനം വൈകിപ്പിച്ചതില്‍ കൗണ്‍സിലിന്റെ വൈര നിര്യാതന ബുദ്ധിയുണ്ടോ എന്ന് സംശയിക്കേണ്ടിയിരുന്നതായി കമ്മിഷന്‍ ഉത്തരവില്‍ പറഞ്ഞു.
പരാതിക്കാരന്റെ പേരില്‍ വിജിലന്‍സ് കേസുകളൊന്നും നിലവിലില്ല. പരാതിക്കാരന്റെ നിയമനം സംബന്ധിച്ചുള്ള തര്‍ക്കങ്ങള്‍ നിലവില്‍ ഉണ്ടായിരുന്നെങ്കില്‍ 20,000 രൂപ വീതം 2016ല്‍ പിരിയുന്നതുവരെ ഹോണറേറിയം നല്‍കാന്‍ സാധ്യതയില്ലെന്നും കമ്മിഷന്‍ ഉത്തരവില്‍ പറഞ്ഞു.