തേഞ്ഞിപ്പലം: സര്‍ക്കാരിന്റെ പുതിയ ഓര്‍ഡിനന്‍സിനെ തുടര്‍ന്ന് കാലിക്കറ്റ് സര്‍വകലാശാലയില്‍ പദവി നഷ്ടപ്പെട്ട രജിസ്ട്രാര്‍, പരീക്ഷാ കണ്‍ട്രോളര്‍ എന്നീ തസ്തികകളില്‍ വൈസ് ചാന്‍സലര്‍ കഴിഞ്ഞ ദിവസം മറ്റു ഉദ്യോഗസ്ഥര്‍ക്ക് താല്‍ക്കാലിക ചുമതല നല്‍കി. രജിസ്ട്രാറുടെ ചുമതല ജോ. രജിസ്ട്രാര്‍ പി. അജിതക്കും, ജോ. രജിസ്ട്രാര്‍ വേലായുധന്‍ കല്ലേപ്പുറത്തിന് പരീക്ഷാ കണ്‍ട്രോളറുടെയും താല്‍ക്കാലിക ചുമതലയാണ് വി.സി നല്‍കിയത്.

ബന്ധപ്പെട്ട ഉദ്യോഗസ്ഥര്‍ ലീവെടുക്കുമ്പോഴും ഔദ്യോഗിക ആവശ്യങ്ങള്‍ക്കായി കൂടുതല്‍ ദിവസങ്ങള്‍ സര്‍വകലാശാലയില്‍ ഇല്ലാതിരിക്കുമ്പോഴും നല്‍കുന്ന ചുമതലയാണിത്. പരീക്ഷാ കണ്‍ട്രോളര്‍ക്ക് കാലിക്കറ്റില്‍ തുടരാനാകില്ലെങ്കിലും രജിസ്ട്രാറെ മറ്റു തസ്തിക നല്‍കി കാലിക്കറ്റില്‍ തന്നെ നിലനിര്‍ത്താനുള്ള നീക്കം നടക്കുന്നതായാണ് സൂചന.