#അബ്ദുസ്സലാം കൂടരഞ്ഞി

റിയാദ്: സഊദിയില്‍ വ്യാവസായിക മേഖല കേന്ദ്രീകരിച്ചു പുതിയ സഊദി വല്‍ക്കരണ പദ്ധതി നടപ്പാക്കാനൊരുങ്ങി അധികൃതര്‍. സഊദി സാമ്പത്തിക തലസ്ഥാനമെന്നറിയപ്പെടുന്ന കിഴക്കന്‍ പ്രവിശ്യയിലെ വ്യാവസായിക മേഖലയിലെ തൊഴിലുകളാണ് സഊദികള്‍ക്ക് മാത്രമായി പരിമിതപ്പെടുത്തുന്നത്. പുതിയ തീരുമാനം മലയാളികളടക്കമുള്ള ആയിരക്കണക്കിനു വിദേശികളെയാണ് ബാധിക്കുക. നിലവില്‍ കിഴക്കന്‍ പ്രവിശ്യയിലെ വ്യാവസായിക ശാലകളില്‍ ഉയര്‍ന്ന ശമ്പളത്തില്‍ പൂര്‍ണ സൗകര്യത്തോടെയാണ് വിദേശികള്‍ തൊഴിലെടുക്കുന്നത്.

സഊദി വല്‍ക്കരണത്തിന്റെ ഭാഗമായി തൊഴില്‍ സാമൂഹിക ക്ഷേമ മന്ത്രാലയത്തിന്റെ കിഴക്കന്‍ മേഖല വിഭാഗവും റോയല്‍ കമ്മിഷന്‍ ഓഫ് ജുബൈലും ഹ്യൂമന്‍ റിസോഴ്‌സസ് ഡെവലപ്‌മെന്റ് ഫണ്ടും യോജിച്ച് പ്രത്യേക കമ്മിറ്റി രൂപീകരിക്കാന്‍ തീരുമാനിച്ചിരിക്കുകയാണ്. കഴിഞ്ഞ ദിവസം ജുബൈല്‍ ഇന്‍ഡസ്ട്രിയല്‍ സിറ്റിയില്‍ വിവിധ സ്ഥാപനങ്ങളുടെ പ്രതിനിധികളുടെ സംഗമത്തില്‍ നടന്ന ഹ്യൂമന്‍ റിസോഴ്‌സസിന്റെയും ട്രെയിനിങ് ഒഫിഷ്യല്‍സിന്റെയും ആദ്യ യോഗത്തിലാണ് ബന്ധപ്പെട്ടവര്‍ ഇക്കാര്യം അറിയിച്ചത്.

നിരവധി സഊദി യുവാക്കള്‍ തങ്ങളുടെ കഴിവുകള്‍ പ്രകടിപ്പിക്കാനുള്ള അവസരം തേടി നടക്കുകയാണെന്നും അതുകൊണ്ട് യുവാക്കളെ തൊഴില്‍ മേഖലയിലേക്ക് കൂടുതല്‍ അടുപ്പിക്കുകയാണ് തങ്ങളുടെ ലക്ഷ്യമെന്നും തൊഴില്‍ വകുപ്പ് ഡയരക്ടര്‍ അബ്ദുറഹ്മാന്‍ അല്‍ മുഖ്ബല്‍ അറിയിച്ചു.
വ്യാവസായിക മേഖലയിലെ ഏതൊക്കെ ജോലികളില്‍ സ്വദേശിവല്‍ക്കരണം നടത്തണമെന്ന തീരുമാനം താമസിയാതെ പ്രഖ്യാപിക്കും.