പാലക്കാട്: കാര്‍ഷികവികസന-കര്‍ഷകക്ഷേമ വകുപ്പിന്റെ ആഭിമുഖ്യത്തില്‍ ഏപ്രില്‍ 12,13 തിയതികളില്‍ നടത്തുന്ന വിഷുക്കണി 2017 പച്ചക്കറി വിപണനശാലകളുടെ ജില്ലാതല ഉദ്ഘാടനം ജില്ലാ പഞ്ചായത്ത് പ്രസിഡന്റ് കെ.ശാന്തകുമാരി നിര്‍വഹിച്ചു.സ്റ്റേഡിയം ബസ് സ്റ്റാന്‍ഡിന് സമീപമുള്ള വെജിറ്റബ്ള്‍ ആന്‍ഡ് ഫ്രൂട്ട് പ്രമോഷന്‍ കൗണ്‍സിലി (വി.എഫ്.പി.സി.കെ)ന്റെ  'സസ്യ' സ്റ്റാളില്‍ നടന്ന പരിപാടിയില്‍ ജില്ലാ പഞ്ചായത്ത് വികസനകാര്യ സ്റ്റാന്റിങ് കമ്മിറ്റി ചെയര്‍പേഴ്‌സണ്‍ എ.ഗീത അധ്യക്ഷയായി. നഗരസഭ വൈസ് ചെയര്‍മാന്‍ സി.കൃഷ്ണകുമാര്‍ ആദ്യ വില്പന നടത്തി. കൃഷിവകുപ്പിന്റെ 84, വെജിറ്റബ്ള്‍ ആന്റ് ഫ്രൂട്ട് പ്രമോഷന്‍ കൗണ്‍സിലിന്റെ (വി.എഫ്.പി.സി.കെ) ഏഴ്, ഹോര്‍ട്ടികോര്‍പ്പിന്റെ അഞ്ച് അടക്കം ജില്ലയില്‍ 96 ചന്തകളാണ് പ്രവര്‍ത്തിക്കുക. രാവിലെ 9.30 മുതല്‍ വൈകീട്ട് ഏഴ് വരെ വിഷു ചന്തകള്‍ പ്രവര്‍ത്തിക്കും. 30 ശതമാനം വിലക്കിഴിവില്‍ പച്ചക്കറികള്‍ ലഭിക്കും.