ചെന്നൈ: ദക്ഷിണേന്ത്യന്‍ തെരഞ്ഞെടുപ്പ് പര്യടനത്തിനായി തമിഴ്‌നാട്ടിലെത്തിയ കോണ്‍ഗ്രസ് അധ്യക്ഷന് വന്‍ സ്വീകരണം. സഖ്യകക്ഷിയായ ഡി.എം.കെ അടക്കമുള്ള പാര്‍ട്ടികള്‍ നടത്തുന്ന പ്രചാരണത്തില്‍ കോണ്‍ഗ്രസ് അധ്യക്ഷനും കൂടി പങ്കാളിയായതോടെ തെരഞ്ഞെടുപ്പ് റാലികളില്‍ വന്‍ ജനപങ്കാളിത്തമാണുണ്ടായത്. നാഗര്‍കോവില്‍ നടന്ന റാലിയില്‍ രാഹുല്‍ ഗാന്ധിയാണ് പ്രധാനമന്ത്രി സ്ഥാനത്തേക്ക് ഏറ്റവും അനുയോജ്യനെന്ന് വ്യക്തമാക്കിയ ഡി.എം.കെ അധ്യക്ഷന്‍ എം.കെ സ്റ്റാലിന്‍, അദ്ദേഹത്തിന്റെ കൈകളില്‍ രാജ്യസുരക്ഷ ഭദ്രമായിരിക്കുമെന്നും പ്രഖ്യാപിച്ചു.

അധികാരം അടുത്തു തന്നെ മാറിവരും. പാവങ്ങളുടെ കൈകളിലേക്കായിരിക്കും അത് എത്തുക. അപ്പോള്‍ സാധാരണക്കാരനായ ഒരാള്‍ എന്ന നിലയില്‍ രാഹുല്‍ രാജ്യത്തെ നയിക്കും. രാഹുല്‍ ഒരിക്കലും മോദിയെപോലാകില്ലെന്നും സ്റ്റാലിന്‍ പറഞ്ഞു. തമിഴ്‌നാട്ടില്‍ നേരത്തെ തന്നെ ഡി.എം.കെ-കോണ്‍ഗ്രസ് സഖ്യം നിലവില്‍ വന്നിരുന്നു. 20 സീറ്റുകളിലാണ് ഡി.എം.കെ മത്സരിക്കുന്നത്.