കാഠ്മണ്ഡു: സാഫ് കപ്പ് വനിതാ ഫുട്‌ബോളില്‍ ഇന്ത്യന്‍ ടീമിന് നേപ്പാളില്‍ വിജയത്തുടക്കം. ഇന്നലെ നടന്ന മത്സരത്തില്‍ മാല്‍ഡീവ്‌സിനെ എതിരില്ലാത്ത ആറു ഗോളുകള്‍ക്ക് മുക്കിയായിരുന്നു ഇന്ത്യന്‍ വനിതകള്‍ കരുത്ത് കാണിച്ചത്. സഞ്ജുവിന്റെ ഇരട്ട ഗോളിന്റെ കരുത്തിലായിരുന്നു ഇന്ത്യ വിജയം സ്വന്തമാക്കിയത്.

ആദ്യ പകുതിയില്‍ തന്നെ ഇന്ത്യ അഞ്ചു ഗോളുകള്‍ക്ക് മുന്നില്‍ എത്തിയിരുന്നു. സഞ്ജുവിനെ കൂടാതെ ഗ്രേസ്, ഇന്ദുമതി, രത്‌നബാല, സന്ധ്യ എന്നിരും ഇന്ത്യക്കായി ഗോള്‍ നേടി. 17ന് ശ്രീലങ്കയ്ക്ക് എതിരേയാണ് ഇന്ത്യയുടെ അടുത്ത മത്സരം. തുടര്‍ച്ചയായ അഞ്ചാം തവണയും സാഫ് കിരീടം നേടാമെന്ന പ്രതീക്ഷയിലാണ് ഇന്ത്യന്‍ സംഘം. സാഫ് ടൂര്‍ണമെന്റ് ആരംഭിച്ചത് മുതല്‍ ഇതുവരെ എല്ലാ തവണയും ഇന്ത്യയാണ് കപ്പ് ഉയര്‍ത്തിയത്. ഇതുവരെ സാഫ് കപ്പില്‍ കളിച്ച എല്ലാ മത്സരങ്ങളും ഇന്ത്യ വിജയിക്കുകയും ചെയ്തിട്ടു@ണ്ട്.
സാഫ് കപ്പില്‍ പരാജയം അറിയാത്ത 20 മത്സരങ്ങള്‍ എന്ന റെക്കോര്‍ഡിലാണ് ഇന്ത്യ ഇപ്പോള്‍ ഉള്ളത്. ജയത്തില്‍ സന്തോഷമുണ്ടെന്നും കിരീടവുമായിട്ടായിരിക്കും ടീം തിരിച്ചുവരികയെന്നും പരിശീലക പറഞ്ഞു.