കാസര്‍കോട്: വ്യാജ നമ്പര്‍ പ്ലേറ്റ് വച്ച് ഓടിയ 12 ബൈക്കുകള്‍ ഇന്നലെ രാവിലെ നടത്തിയ പരിശോധനയില്‍ പൊലിസ് പിടികൂടി. നമ്പര്‍ പ്ലേറ്റില്‍ ഫോര്‍ രജിസ്‌ട്രേഷനും ഫെയില്‍ഡ് രജിസ്‌ട്രേഷനും രേഖപ്പെടുത്തിയവയടക്കമുള്ള ബൈക്കുകളാണ് പിടികൂടിയത്. നമ്പര്‍ പ്ലേറ്റിന് മുകളിലാണ് ഇവര്‍ ഇത്തരം സ്റ്റിക്കറുകള്‍ ഒട്ടിച്ചിരുന്നത്. ഇതു കൂടാതെ തെറ്റിദ്ധരിപ്പിക്കുന്ന രീതിയിലുള്ള നമ്പറുകള്‍ രേഖപ്പെടുത്തുകയും ചെയ്തിട്ടുണ്ട്. ഇത്തരത്തില്‍ നമ്പറുകളില്‍ കൃത്രിമം നടത്തുന്നവര്‍ മാല പൊട്ടിക്കല്‍ അടക്കം നിരവധി കുറ്റകൃത്യങ്ങള്‍ നടത്തുന്നുണ്ടെന്നാണ് പൊലിസ് പറയുന്നത്.
ഇത്തരം നമ്പര്‍ പ്ലേറ്റുകള്‍ തയാറാക്കി കൊടുക്കുന്ന സ്ഥാപന ഉടമകള്‍ക്കെതിരേയും കേസെടുക്കുമെന്ന് പൊലിസ് വ്യക്തമാക്കി. ഇപ്പോള്‍ മോട്ടോര്‍ വാഹനവകുപ്പ് നിയമപ്രകാരമാണ് വാഹനങ്ങള്‍ പിടികൂടി നടപടികള്‍ സ്വീകരിക്കുന്നത്. ഇത് ആവര്‍ത്തിച്ചാല്‍ വിവിധ വകുപ്പുകള്‍ ചേര്‍ത്ത് ക്രിമിനല്‍ കേസെടുക്കുമെന്നും അധികൃതര്‍ പറഞ്ഞു.