മലപ്പുറം: അഞ്ചു കിലോ കഞ്ചാവുമായി യുവാവിനെ എക്‌സൈസ് സംഘം അറസ്റ്റ് ചെയ്തു. വള്ളുവമ്പ്രം മഞ്ചേരിതൊടിയില്‍ അബ്ദുല്‍ ലത്വീഫാ (28) ണ് പിടിയിലായത്. ജില്ലയിലെ വള്ളുവമ്പ്രം, അത്താണിക്കല്‍ ഭാഗങ്ങളില്‍ ഇതര സംസ്ഥാന തൊഴിലാളികള്‍ക്കും വിദ്യാര്‍ഥികള്‍ക്കും വിതരണം ചെയ്യാനായി ഓട്ടോയില്‍ കഞ്ചാവ് കടത്തുന്നതിനിടെയാണ് ഇയാള്‍ പിടിയിലായത്.
തമിഴ്‌നാട്, കമ്പം, തേനി ഭാഗങ്ങളില്‍നിന്നു കഞ്ചാവ് ശേഖരിച്ച് മലപ്പുറം ബസ് സ്റ്റാന്‍ഡില്‍ എത്തിച്ച ശേഷം ഓട്ടോറിക്ഷയില്‍ വള്ളുവമ്പ്രം, അത്താണിക്കല്‍ ഭാഗങ്ങളില്‍ എത്തിക്കുന്നതാണ് ഇയാളുടെ പതിവ്. അബ്ദുല്‍ ലത്വീഫ് മുന്‍പും മയക്കുമരുന്ന് കേസില്‍ പ്രതിയായിട്ടുണ്ട്. അടുത്തിടെ ഇയാള്‍ക്ക് 3.5 ലക്ഷത്തോളം രൂപയുടെ ലോട്ടറിയടിച്ചിരുന്നു. കഞ്ചാവ് വില്‍പനയില്‍ ഇയാളെ സഹായിക്കുന്നവരെക്കുറിച്ചുള്ള വിവരങ്ങള്‍ ശേഖരിച്ചുവരികയാണ്.
അസിസ്റ്റന്റ് എക്‌സൈസ് കമ്മിഷണറുടെ നിര്‍ദേശമനുസരിച്ച് മലപ്പുറം എക്‌സൈസ് റെയ്ഞ്ച് എക്‌സൈസ് ഇന്‍സ്‌പെക്ടര്‍ പി. സുരേഷ് കുമാറും സംഘവും പ്രതിയെ മലപ്പുറം ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതി മുന്‍പാകെ ഹാജരാക്കി.
റെയ്ഡിനും വാഹന പരിശോധനയ്ക്കും എക്‌സൈസ് ഇന്‍സ്‌പെക്ടര്‍ പി. സുരേഷ്‌കുമാര്‍, അസി. എക്‌സൈസ് ഇന്‍സ്‌പെക്ടര്‍ വി. രാധാകൃഷ്ണന്‍, സിവില്‍ എക്‌സൈസ് ഓഫിസര്‍മാരായ ജയകൃഷ്ണന്‍, കൃഷ്ണന്‍ മരുതാടന്‍, ബാബുരാജന്‍, ശംസുദ്ദീന്‍, ധനേഷ്, സജീഷ്, ഡ്രൈവര്‍ ശശീന്ദ്രന്‍ എന്നിവര്‍ നേതൃത്വം നല്‍കി. പരിശോധന ശക്തിപ്പെടുത്താനും അന്വേഷണം തമിഴ്‌നാട്ടിലേക്ക് വ്യാപിപ്പിക്കാനും അസിസ്റ്റന്റ് എക്‌സൈസ് കമ്മിഷണര്‍ നിര്‍ദേശം നല്‍കിയിട്ടുണ്ട്.