സ്ഥലം ഒരു ഇന്റര്‍നെറ്റ് കഫേ. കമ്പ്യൂട്ടറുകള്‍ക്കു മുന്നില്‍ ചടഞ്ഞിരിക്കുന്ന കുറച്ചു പേര്‍. എന്നാ പിന്നെ പറഞ്ഞപോലെ..കൂട്ടുകാരോട് ഹായ് പറഞ്ഞ് അലസമായി പുറത്തേക്കിറങ്ങുന്ന യുവാവ്.
പിന്നെ പെട്ടെന്ന് രംഗം മാറി മറിയുന്നു. പുറത്തേക്കിറങ്ങിയ യുവാവ് വാതിലിനടുത്തെത്തിയതും ഒരു 'വീരന്‍' മൂപ്പരുടെ ട്രൗസറില്‍ കടിച്ചു തൂങ്ങുന്നു. പിന്നെ യുവാവിന് ഒന്നും ഓര്‍മയില്ല. യുവാവിന്റെ സ്ഥലകാലബോധമില്ലാത്ത പരാക്രമവും മറ്റുള്ളവരുടെ സ്വന്തം തടി രക്ഷപ്പെടുത്തലുമാണ് സീനില്‍.

ഇത് ഏതെങ്കിലും തട്ടിക്കൂട്ട് ഷോര്‍ട്ട് ഫിലിം രംഗമാണെന്ന് കരുതിയാല്‍ തെറ്റി. കഫേയില്‍ നിന്ന് പുറത്തിറങ്ങുമ്പോള്‍ വസ്ത്രത്തില്‍ കടിച്ചു തൂങ്ങിയ പാമ്പില്‍ രക്ഷപ്പെടാനുള്ള യുവാവിന്റെ പരാക്രമവും പാമ്പിനെ കണ്ട് പേടിച്ച് കൂട്ടുകാരുടെ പ്രതികരണവുമാണിത്. ഏപ്രില്‍ എട്ടിന് തായ്‌ലന്‍ഡിലെ വിസെറ്റ് ചായ് ചാന്‍ ജില്ലയിലെ കഫേയിലാണ് സംഭവം.

സി.സി.ടി.വി കാമറയില്‍ പതിഞ്ഞ ദൃശ്യങ്ങള്‍ ഇപ്പോള്‍ വൈറലായിരിക്കുകയാണ്. പാമ്പ് ഒരു ഭീകരജീവിയാണെങ്കിലും കാണുന്നവരില്‍ ചിരിയുണര്‍ത്തുന്നതാണ് ദൃശ്യങ്ങള്‍.